UDAH TEMBU… Tiong (kanan) ngelekat papan tanda projek nyeleti rumah panjai di Rumah Hillary kelai bejadika pengawa nya.

SIBU: Perintah Sarawak bisi agih belanja dikena nyeleti enggau ngemanah genap rumah panjai ba menua tu.

Adun Dudong, Datuk Seri Tiong King Sing madah, sesebuah rumah panjai mesti mantaika peminta sida ngambi tau bulih agih belanja ti disediaka nya.

Ku iya, polisi bantu nya endang udah lama dikemeran Perintah Gempung Parti Sarawak (GPS) dikena ngubah pengidup rayat ba menua pesisir.

Tiong mansutka jaku nya lebuh bejadika Projek Nyeleti Rumah Panjai di Rumah Hillary Chukan, Sungai Menyan, Hari Enam tu tadi.

Iya minta Tuai Rumah semampai betanyaka pekara tu ngagai opis pelilih tauka palan servis iya ngambi minta agih belanja ti disediaka nya.

“Perintah Sarawak semampai nyendia enggau ngagihka belanja bekaul chara berenggat dikena nyeleti rumah panjai.

“Taja pia, Komiti Pemansang enggau Pengelikun Genturung Pendiau (JKKK) rumah panjai mesti meri kerejasama nganjung ripot projek nya ngambi agih belanja diadu manah lebuh proses ngagihka belanja ungkup renggat bukai,” ku Kaban Parlimen Bintulu nya.

Nambahka nya, Tiong nangkan peranak rumah panjai anang mudah kena panjuk sindiket nipu kereja lebih agi nembiak ke deka bekuli.

Nya alai, Presiden Parti Progresif Demokratik (PDP) nya dekaka apai indai semampai ngingatka anak sida ngiga kereja enggau ejensi ti sah.

“Kita mesti mansik dulu pejalai serikat enggau anang nerima aja kereja ti disediaka nya.

“Diatu suah kitai ninga berita nembiak ba menua tu kena tipu sindiket baka tu laban enda mansik enggau meresa dulu,” ku Tiong madah nyemetak.

Nya alai, iya ngelalau raban nembiak belajarka pengelandik teknikal ti disediaka ba palan pelajar tinggi ditu ngambi enda bepanggai ba pengereja menua luar.

Duta Khas Menteri Besai Ke China nya madahka pengereja landik chukup beguna ba menua tu baka ba bidang kapal, welding enggau ke bukai laban mayuh peluang nambahka penatai pemisi.

“Nengah kerejasama kita deka nyukung ekonomi menua sereta sama nyungkak ekonomi menua.

“Pengawa badu bepanggai ba pengereja menua luar mega deka nambahka produktiviti kereja kitai sereta nyendiaka mayuh agi peluang kereja ngagai anak Malaysia,” ku iya nerang baru.

Sama datai Chairman PDP Bagi Menua Dudong, Kaunselor Teo Boon Siew, Penghulu Paing Tawi enggau Tuai Rumah Hillary.
-abis-


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak