NGABAS… Riot ngabas palan beperesa pengerai lebuh Pengawa Ngelancharka Pejalai Agenda Nasional Malaysia Bepengerai (ANMS) Renggat Bagi Menua Serian di Laman Lepapa, kemari.

SERIAN: Mensia mayuh anang takut meresa tikas pengerai diri, ku lalau Datuk Seri Richard Riot Jaem.

Duta Khas Jipun, Republik Korea enggau Taiwan nya madah, ulah baka nya semina ngujungka sida nangi datai beperesa pengerai.

Ku iya, ari 1,225 iku dikeandal beperesa pengerai Peka B40 di Bagi Menua Serian, semina 524 iku ke datai beperesa pengerai.

“Ari penyampau ti diberi Opis Pengerai Bagi Menua Serian, mimit aja orang ke datai beperesa pengerai.

“Nya kebuah, nengah program ti dilanchar sehari tu, aku ngarapka mensia mayuh datai beperesa pengerai. Tu dikena nyaga pengerai diri empu,” ku iya.

Riot mansutka jaku nya ba Pengawa Ngelancharka Pejalai Agenda Nasional Malaysia Bepengerai (ANMS) Renggat Bagi Menua Serian di Laman Lepapa, kemari.

Iya ke mega Kaban Parlimen Serian madah, mensia mayuh mesti nemu tikas pengerai diri enggau mesti beperesa pengerai diri belama.

Ku iya, kebuah pia laban sida ke ditepan penyakit nadai berampit (NCD) baka kemi manis, tinggi darah enggau penyakit jantung enda ditemu.

“Nitihka penerang ari Opis Menteri Pengerai Malaysia (KKM) siku ari lima iku ditepan penyakit kemi manis, tiga ari 10 iku ditepan penyakit tinggi darah enggau empat ari 10 iku bisi kolestrol,” ku iya.

Berebak enggau nya ku Riot, mensia mayuh enda tau enda beperesa pengerai ngambi nemu tikas pengerai diri.

Nambahka nya, Pegawai Epidemiologi Dr Sharifah Noraskhin Wan Ahmad ngarika Pegawai Opis Pengerai Bagi Menua Serian madah, sida ti ditepan penyakit NCD mudah agi kena rampit Covid-19 ke raya enggau tau bebadi nyawa.

Ku iya, taja kitai ngalih ngagai endemik tang igi penyakit Covid-19 agi ngerekai ba timpuh lama enggau kitai mesti nyendiaka diri napi pandemik baru.

Nya alai ku iya, pengerai nya tanggung pengawa diri empu lalu mesti bisi penemu pasal chara nyaga pengerai diri.

“Kita mesti beperesa pengerai diri tumu ngambi ulih nemu penyakit ke nepan ba tubuh diri.
“Enti ditemu tumu, kitai ulih berubat tumu enggau nyeliahka penyakit bukai,” ku iya.

Sama datai Residen Serian Selamat Jati Yanjah, Pegawai Opis Pelilih Serian Lim Hock Meng enggau Menijar Palan Besai Bebelika Barang, Lepapa Serian Jolando Francis Ulu.

Suara Sarawak