Juana (kanan) enggau Lauren (kiba) begambar enggau indai seduai iya rambau pengerami graduasyen Swinburne University of Technology Sarawak di BCCK tadi .

KUCHING: Dua iku diri menyadi bekunsi pengaga ati laban seretai bulih degree ba pelajar ti diambi nyerumba pengerami graduasyen Swinburne University of Technology Sarawak pagi tadi.

Juana Poyong, 24 enggau Lauren Joulan, 27 asal ari Kota Kinabalu, Sabah sama bela ngena pekayan asal bansa Kadazan ba pengerami nya.

Juana ngambi Degree ba bidang Dagang (Akauntan enggau Pekara Wang) ke alai Lauren ngambi Degree ba bidang Injinir.

Lebuh ditanya pemberita ba Palan Aum Borneo Kuching (BCCK), Juana madahka diri milih universiti tu ketegal universiti nya nadai ba Sabah.

“Di Sabah bedau bisi Universiti Australia baka Curtin enggau Swinburne, nya alai apai aku ngasuh nyambung sekula ba Swinburne laban tu entara universiti pemadu manah.

“Aku diatu benung nampung pelajar ngambi master ba Universiti Malaysia Sabah (UMS), udah nya deka ngambi MBA.

“Enti mujur, aku deka ngiga pengawa nyadi pengelicha tauka pengawa bukai ti besangkut paut enggau akauntan,” ku iya.

Iya madahka diri berasai gaga laban diberi peluang sekula di Sarawak ti ngembuan rayat pupu raban bansa.

“Ngagai bala nembiak ti benung besekula, gaga meh pengawa enggau manah, dingaka jaku pengelicha, ngaga kereja rumah sereta bebendar ngulihka pointer ti tinggi,” ku iya.

Ngangkan nya, Lauren mega madahka diri udah bulih pengawa di Sabah.

“Aku berasai temegah laban bulih pengawa rambau pandemik Covid-19, diatu baru bisi peluang betemu enggau bala bakih laban sebedau tu kami belajar nengah online.

“Aku mega temegah meda menyadi aku mujur bulih degree, lalu kami duai sama ulih ngasuh apai enggau indai gaga sehari tu.

“Ngagai bala nembiak ti benung sekula, anang muntang alah laban penguji, belajar bebendar, kemegahka apai indai kitai, nya meh pengingat ti pemadu berega lebuh meda sida ketawa gaga,” ku iya.

Juana (kanan) enggau Lauren (kiba) begambar enggau siku pengelicha pengerami graduasyen Swinburne University of Technology Sarawak di BCCK tadi.

Suara Sarawak