DATUK PATINGGI TAN SRI ABANG JOHARI

KUCHING: Sarawak begunaka Pemansut Asil Dalam Menua (GDP) manggai enam ngagai lapan peratus dikena ngerandang jalai nuju nengeri mansang ba taun 2030.

Premier Sarawak Datuk Patinggi Tan Sri Abang Johari Tun Openg madahka iya meda pekara nya dipelabaka ulih meri pengandal ati ngagai pemeranak puku ngagai ekonomi Sarawak ba jeman ti deka datai.

“Kemari (ensana) aku ninga ripot ari Bank Negara, pasal penumbuh ekonomi kitai dalam angka lapan nyentuk semilan peratus.

“Ungkup Sarawak, laban kitai deka nuju ngagai nengeri mansang ba taun 2030 bagi timpuh panjai, kitai begunaka penumbuh GDP dalam enam ke lapan peratus,” ku iya.

Abang Johari bejaku munyi nya rambau Bejadika Pengerami Ngintu Bulan Kebangsaan Enggau Ngitau Jalur Gemilang Renggat Nengeri 2022 di Dun ditu, kemari.

Iya nangkan nya, andalka anak-anak Sarawak ulih nambahka peneleba enggau penau ngambika rayat ulih bulih pengelantang dalam ekonomi ti tegap kelebih agi pemansang menua pesisir.

“Kitai mega andalka peranak di menua pesisir sama bela ulih ngasaika perengkaguna moden dalam Malaysia Sebilik ti manah tu.

“Nya alai, semua rayat Sarawak megai tanggungpengawa ti besai ngintu Hari Merdeka dalam nerenak semangat sayauka menua,” ku iya.

Suara Sarawak