BEJADI… Abang Johari Tun Openg bejadika Pengerami Makai Lemai IEM Pampang Sarawak 2022 seraya dikemataka (ari kiba) ex-chairman IEM Pampang Sarawak Vincent Tang, Dr Sim Kui Hian enggau Chairman IEM Pampang Sarawak Datuk Janang Bungsu.-Gambar MOHD ALIF NONI

KUCHING: Sarawak begunaka mayuh agi injinir kimia dikena nyukung enggau ngerandang industri petrokimia nengeri tu.

Premier Sarawak Datuk Patinggi Tan Sri Abang Johari Tun Openg madah, mayuh peminta nguna mayuh agi injinir di nengeri tu laban bisi dua perambu beranakka puku petrokimia di Bintulu.

“Bisi dua perambu beranakka puku petrokimia tama ke Sarawak, bela berega AS$6 bilion. Puku tu iya nya bekaul enggau nyerara gas masam di loji Bintulu, iya nya siti proses ke chukup mar.

“Nya alai, nengah pengawa beranakka puku tu, enda nyengkaum loji metanol. Kitai begunaka mayuh injinir kimia.

“Enggau nya, aku meransang Institut Injinir Malaysia (IEM) matak mayuh agi raban nembiak ngambi bagi ba injinir kimia,” ku iya ba Pengerami Makai Lemai Ninting Taun IEM Pampang Sarawak ditu, ensana.

Ngelansa silik, ku iya Sarawak bela ngembuan rizab gas  ke manah laban lebih 60 peratus ari rizab gas Malaysia endang ari nengeri tu.

“Nya alai, kitai mesti nambah rega ngagai gas tu lalu ukai agi semina eksport gas tulin (LNG). Mayuh ulih diproses ari gas ke dikembuan kitai.

“Beduduk ari nya, kami begunaka mayuh injinir kimia ti deka ngerandang industri petrokimia nengeri tu. Aku andal manggai taun 2030, Sarawak deka nyadi pengeluar produk petrokimia di Malaysia,” ku iya.

Tandu iya, nengah kuing tuju perintah diatu,  iya ngarapka bidang  injinir deka dikerembai ukai semina ari sukut sivil, elektrikal, mekanikal, tang mega injinir kimia.

Ngelansa pekara bukai, iya madah IEM Sarawak udah ngerembai enggau tegap seriris enggau pemansang ekonomi kemaya hari lebih agi nengah pengawa ngemujurka Strategi Ekonomi Digital Sarawak 2018 – 2022.

“Aku bisi dipadah IEM Sarawak ngembuan lebih 2,000 injinir peranak menua tu berejister lalu agi ngembuan serakup profesional pemadu besai ba nengeri tu iya nya 10,432 injinir profesional enggau 9,465 agi injinir profesional benung ngulihka setipikit profesional.

“Tu mih raban orang landik ke nadai dipegendang, sida bejalaika tanggungpengawa ke chukup besai guna ungkup pemansang nengeri.

“Enda ulih dikeengai iya nya injinir chukup beguna ungkup pengidup dudi hari ba Sarawak,” ku iya.

Suara Sarawak