NEMPA SEJARAH… Abang Johari (dua kanan) bejadika Muzium Limbang kemari seraya dikemata Karim (tiga kiba) enggau Abdul Rahman (kanan).

LIMBANG: Muzium Limbang ti baru dipenyadi kemari dikena mandangka status pemansang pelilih nya ari pasar mit dataika nyadi mengeri ti maju diatu.

Muzium Limbang ti digaga ngena ungkus RM6.39 juta nya mega mandangka sejarah enggau turai pengidup Premier Sarawak Datuk Patinggi Tan Sri Abang Johari Tun Openg ti diada ba kuarters perintah ba pelilih nya.

Ku Menteri Dagang Temuai, Industri Kreatif enggau Seni Pemerindang, Datuk Seri Karim Rahman Hamzah, pengawa bejadika begunan ikonik nya ngelaika Muzium Limbang nyadi palan ke chukup nyelai sereta narit ati.

“Aku pechayaka endur nirika muzium tu enggau baka ni begunan tu didiri ngembuan sejarah ke chukup berega ngagai Premier kitai.

“Ukai semina ungkup Premier kitai aja tang mega bela diasaika rayat ditu.

“Tambah mega, aku mega menteri dagang temuai enggau Opis Muzium chukup temegah meda muzium di menua tu majak nambah,” ku iya.

Karim mansutka jaku nya ba Pengawa Bejadika Muzium Limbang ti dipenyadi Premier Sarawak, Datuk Patinggi Tan Sri Abang Johari Tun Abang Openg, kemari.

Ngelansa pasal muzium nya, Karim madahka Muzium Limbang deka bisi dua galeri ke alai siti ari nya deka nyadi replika kuarters pegawai perintah ari suba enggau siti agi deka mandangka pemansang Limbang.

Taja pia ku iya, koleksyen muzium nya apin ditusun enggau dilekat penuh laban projek nya baru aja tembu.

“Kitai nganti enda lama agi laban Opis Muzium Sarawak deka nambahka mayuh agi koleksyen dalam muzium nya.

“Utai ke ulih dipeda kitai diatu nya begunan ke udah tembu tang koleksyen Muzium Limbang deka ditambah pengudah dipenyadi,” ku terang Karim.

Berebak enggau nya, Karim madahka opis menteri iya keran mandangka mayuh agi muzium di menua ngambi mensia mayuh majak minat pasal sejarah, pesaka asal enggau main asal di muzium.

Bechuntoka pengawa bejadi enggau muka Muzium Budaya Borneo, iya madah, naka diatu penyampau pengusung lebih 350,000 taja baru lima bulan dibuka.

“Nya kebuah, kami dekaka pekara tu majak nambah ngagai palan bukai baka kubu lama, begunan lama perintah ulih dikemanah enggau digazet nyadi palan pesaka asal enggau muzium,” ku Karim.

Karim mega madah, muzium deka nyadi siti produk ke ulih nambahka ekonomi kelimpah meri penemu pasal sejarah ngagai rebak baru.

Nangkan nya, Sapit Menteri Pengawa Betanam Betupi Moden enggau Pemansang Wilayah (Pengawa Betanam Betupi Moden) Datuk Dr Abdul Rahman Ismail madahka pengawa bejadika muzium tu deka nyadi sejarah bagi menua Limbang.

Kelimpah ari nya ku iya, tu mega nyadi ikon enggau pematak temuai baru ke pelilih tu.

“Terima kasih ngagai Perintah Sarawak laban bejalaika inisiatif tu lalu ‘Insya-Allah’, mayuh agi projek pemansang benung dipejalai ba menua tu nyengkaum di Pelilih Limbang,” ku Abdul Rahman.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak