Abdul Karim (tujuh kiba) begambar enggau bala pesereta Program Konvoi Ngena Motosikal Besai di Pelaman Opis Pelajar Nengeri Sarawak ditu, kemari. -Gambar ABDUL HAKEEM WELL

KUCHING: Tikas pemanah kereban berubat di Sarawak sebaka enggau di menua bukai tang palan tu dipilih rayat Indonesia endur berubat empas ari palan tu dampih ari palan diau sida.

Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah madahka Presiden Indonesia Joko Widodo patut enda meda pemayuh rayat Indonesia ti berubat ngagai Sarawak siti pekara ti besai.

“Aku bisi macha penerang ari Presiden Joko Widodo ti madahka rayat Indonesia enti ulih enda ibuh ke luar menua berubat.

“Aku kebendar meda pekara nya baka pengawa begusung ngagai sesebengkah palan baka kitai ti ngusung bakih di menua luar,” ku iya.

Abdul Karim bejaku munyi nya lebuh ditanya pemberita pengudah bejadika Program Ngelepaska Raban Pesereta Konvoi Ngena Motosikal Besai di Pelaman Opis Pelajar Nengeri Sarawak ditu, kemari.

Apin lama Presiden Indonesia nya mansutka jaku asa meda urung 1,000 iku rayat Indonesia ngusung Sarawak pengudah garis entara menua dibuka laban deka berubat kitu kelebih agi ngagai Sepital Normah ke alai pekara nya baka ti ngelaika kereban berubat di menua Indonesia empu enda nitihka tikas kereban berubat menua bukai.

Ku Abdul Karim, penatai raban Indonesia ti berubat ngagai Sarawak ukai nuju sepital perintah tang nuju sepital peribit.

“Nya kebuah di Kuching tu empu mayuh sepital peribit ditumbuhka.

“Aku meda penatai sida kitu sebagi ari sukut dagang temuai berubat, laban engka menua kitai tu dampih sereta muntang dilawa sida ambika chunto rayat Indonesia di Kalimantan.

“Aku ngarapka pekara tu enda ibuh dipeda siti pekara ti besai, awakka aja sida kitu laban sida bisi belanja nemuai kelimpah berubat ditu,” ku iya.

Iya nangkan nya madahka pekara tu ukai semina nyadi ngagai menua Indonesia aja tang mega nyadi ngagai menua Malaysia empu.

“Mayuh rayat Malaysia berubat ngagai Singapore enggau Australia laban deka ngulihka pengerai ti manah.

“Nya ukai mai reti kereban berubat di Indonesia enda seikas enggau menua bukai tang engka ketegal palan sida diau dampih kitai ditu.

“Aku ngarapka Presiden Indonesia meretika pekara tu, kereban berubat di menua kitai tu sama aja enggau menua bukai baka Singapore,” ku iya.

Suara Sarawak