PAPUNG BESI… Papung besi ti ditemu peranak ba Sepupok, Niah di Miri.

MIRI: Siti papung besi ti dipelaba sebagi ari kereban roket Long March 5B diempu menua China bisi ditemu ba Sepupok, Niah.

Papung besi nya ditemu peranak ba Batu Niah sebedau ngaga ripot ngagai polis, pagi tadi.

Tuai Polis Pelilih Miri, Asisten Komisioner Alexson Naga Chabu madah, asil matau tumu, sida tetemuka papung besi dalam tanah ba penalam urung semester semak rumah siku peranak dia.

“Taja pia, polis enda ulih ngenukuka ari ni penatai besi nya lalu udah minta saup tim Hazmat Opis Bomba enggau Penyah Penusah sereta Ejensi Angkasa Malaysia, Opis Menteri Sains, Teknologi enggau Inovasyen (Mosti) ngambi beratika pekara nya,” ku iya.

Nya kebuah, Alexson ngelalau mensia mayuh anang papung besi nya enggaika ngundan radioaktif ke tau ngeruga pengerai enggau pengelikun sida.

Alexson madah, sitak nya udah dipatau rat nentuka nadai penusah enda disadang nyadi.

Nambahka nya ku iya, mensia mayuh mega dipinta anang nempa jaku tauka ngerembai berita bula laban nya tau ngasuh mensia mayuh begau.

Nangkan nya, iya mega minta peranak dia telefon ngagai balai polis besemak ngambi meri penerang tauka deka nemu pengamat pasal utai ke nyadi nya.

Ejensi Angkasa Malaysia, Mosti nengah penerang kemsti ngenukuka papung roket Long March 5B diempu menua China terebai ke Bumi udah ditemu nyadi urung pukul 12.55 malam, Hari Enam tu tadi.

Papung roket nya udah angus maya tama ngagai langit Bumi enggau pejalai papung ti angus nya mega meraka langit Malaysia sereta ulih ditemu ba sekeda sitak nyengkaum ba langit Sarawak.

Papung ti angus nya dirikodka udah labuh ba Tasik Sulu, entara latitud 9.1° Utara enggau longitud 119.0° Timur.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak