JAGA PEMERESI…Anyi Jana meri jaku lalau dalam Program Penyedar Ngintu Rampa Menua begulai enggau komuniti Pelilh Menua Kanowit 2022 kemari.

KANOWIT: Kaban Kunsil Nengeri (Adun) Ngemah, Anyi Jana ngelalau mensia mayuh dilalau semampai ngintu enggau ngemeratka pemeresi kandang menua.

Ku iya, anang muai uras sebarang laban nya ulih ngamahka kandang menua.

“Kitai ti nyadi sebuah komuniti mesti ngembuan tanggungpengawa bekerejasama nyaga pemeresi menua enggaika kamah.

“Buai mih uras ba palan ke betul ambika pemeresi rampa menua tauka palan kitai semampai beresi lalu ulih nyaga pengerai.

“Pia mega, uras ti dibuai mesti diengkahka enggau menyana ba palan muai uras enggaika uras tu tadi beterachir sebarang alai lalu ngamahka palan nya,” ku Anyi.

Iya mansutka jaku tu dalam Program Penyedar Ngintu Rampa Menua begulai enggau komuniti Pelilh Menua Kanowit 2022 kemari.

Program ti diatur ba Rumah Panjai Mang Kapat Skim Pengentap Pendiau Rascom Nanga Jagau endang sebengkah program ti diatur Kaunsil Pengereja Asal enggau Rampa Menua Sarawak.

Sama bisi datai ba program tu iya nya Penyanga Kualiti Pengereja Asal enggau Kaunsil Rampa Menua Sarawak Peggy Ronim, Penghulu Juni Masam, Tuai Komuniti enggau Tuai Raban Bansa (KMKK) sereta mensia mayuh ti besemak pendiau dia.

Suara Sarawak