DATUK PATINGGI TAN SRI ABANG JOHARI

LIMBANG: Perintah Sarawak nampung inisiatif bejalaika pemansang ba Bagi Menua Limbang nengah pelin besai timpuh panjai, ku Premier Sarawak Datuk Patinggi Tan Sri Abang Johari Tun Openg.

Ku iya, program pemansang mungkur menua seberai Limbang nya deka dipejalai pengudah projek ngaga Jematan Kedua Sungai Limbang tembu.

“Endang bisi perambu enti jematan nya udah tembu. Kami deka numbuhka siti pelin besai baru ungkup Limbang nyengkaum ba menua seberai.

“Tu siti pelin timpuh panjai lalu aku andalka pemisi jalai ti dikemansang Ejensi Pemansang Wilayah Utara (NRDA) nentuka Limbang enggau Lawas ulih disambung datai ba Bukit Buda,” ku iya.

Abang Johari mansutka jaku nya lebuh bejadika Surau Darul Ehsan Tun Abang Haji Openg Kampung Bunga Raya di Limbang, ensanus.

Ku iya, inisiatif ti diperambu nya dikena nyendiaka mayuh agi pemansang infrastruktur nyengkaum ngemanah tebing sungai ngambi disikap projek Jematan Limbang Kedua sereta ngemansangka menu aba seberai Limbang laban bisi jalai ke meruan agi.

“Kebuah pia laban jalai ngagai Bukit Buda bekunsi siti tanah enggau Mulu, kitai deka ngaga jalai ari Marudi ke Long Terawan enggau ari Long Terawan ke Mulu ke deka terus ngagai Bukit Buda.
“Reti iya, pejalai ari Miri ke Limbang ulih ditengah ngena jalai alun lalu enda nengah Brunei, Insya-Allah,” ku Abang Johari.

Nambahka nya ku iya, inisiatif nya endang begunaka agih belanja besai tang iya lantang ati pekara nya ulih dijapai laban Sarawak bisi agih belanja tambah asil bejalaika chukai jual minyak enggau gis ti dikena ungkup pengelantang rayat.

“Aku baru lima taun nyadi Premier Sarawak, kitai udah bisi perambu besai ungkup Limbang lebih agi pemansang jalai alun datai ba Lawas enggau nyendiaka agih belanja RM1.5 bilion di bauh NRDA,” ku iya.

Kelimpah ari nya ku iya, penanggul projek laun dipejalai ditu lebih agi Jematan Kedua Limbang enggau Tebing Sungai Limbang nyadi ketegal pandemik Covid-19 tang projek nya deka tembu enda lama agi.

Projek jematan beungkus RM187 juta nya dipelanja Perintah Sarawak penuh enggau diperambu tembu bulan April 2023 pengudah laun dipejalai kenyau ari taun 2017.

Enti nitih projek nya tembu September 2021 tang diperambu baru tembu Oktober 2022 sebedau sekali agi disadang tembu taun 2023.

Projek nya chukup beguna ungkup rayat nyadi jalai penyambung peranak di seberai Sungai Limbang kelimpah nyendiaka jalai baru.
-abis-


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak