PENGINGAT LAMA… Gambar ini tuai sida Tuai Rumah Lipa benama Nangku (dua kanan) enggau bala menyadi iya ke alai gambar diambi sebedau Jipun datai ngalahka menua kitai.
Menyadi sida ke lelaki benama Gelayan pulai ari Singapore. Lebuh din, iya meli baju, kain, tambit baju ke bala menyadi indu iya empat iku (Bingki, Nangku, Mandot enggau Giam).

KENU ku niang aki Tuai Rumah Lipa anak Nyawai ti benama Chupong anak Andok, maya Jipun datai ba menua sida di Tanu suba, dia niang apai iya baru tau meragau.

Niang aki iya suah agi mai niang ini sida benama Jita anak Dukut bemalam ba langkau umai tauka kebun.

Kebuah pia laban takut ninga rita soldadu Jipun balat jai ulah sereta deka bendar masung orang ke indu sereta nangika soldadu Jipun bisi niki ke rumah panjai.

Lebuh diau di langkau umai, sida menyanak ngena api dambar laban nadai minyak gas dikena ngidupka kelita.

Nyadi tekang dambar nya tadi ku Tuai Rumah Lipa, diengkah niang aki iya ba daun biru diterinsung lalu diengkah dalam buluh ditetak pandak ti sandihka ba tisi dinding.

LALU NIKI… Rumah Panjai Tanu ti betuaika Tuai Rumah Lipa Nyawai diatu

“Laban niang apai aku ti benung meragau enda memukai iya lalu ngelawa api dambar ba teluk dinding, benung niang aki enggau niang ini makai lemai.

“Niang apai aku lalu maut buluh ti disandih ba dinding ngujungka buluh rebah lalu ai dambar manjah berang iya. Tudah niang apai aku lalu betu ba berang.

“Nya munyi sabak iya ngetatka pemedis betu tang seninjik bendar niang aki nemu puchau betu. Udahka dipuchau, apai aku lalu enda nyabak agi.

“Macham mega chara seduai ini ngubat apai maya nya. Maya udah gerai, dia berang apai aku lalu belitan, ari litan nya mega orang nemu umur apai aku serebak enggau penatai perintah Jipun megai Sarawak.

“Litan betu laban api dambar agi meruan nyentuk apai aku ninggalka dunya injau tu dalam bulan September 2020,” ku iya ngepunka kenang.

BEBAI NGALAHKA JIPUN

Tuai Rumah Lipa madah, Perintah Jipun balat bendar mai empas pemerinsa ngagai kitai rayat Sarawak. Pia mega kitai Iban ka diau di ulu sungai.

Nya alai ku iya, niang Penghulu Ulin kala mai bala kitai Iban di Batang Layar enggau Spak ngalahka bala soldadu Jipun ba Kubu Lily.

“Kami serumah mega bisi ditiki tiga iku seruan ka diasuh Penghulu Ulin mai bala pungka lelaki sama enggau ngalahka Jipun.

“Kenu ku seruan nya, sapa ti nadai pengari enggau ari sebuah-sebuah rumah panjai, dia rumah panjai deka ditunu baik menang tauka alah ngelaban Jipun.

CHUKUP BEREGA… Gambar bala sida niang aki Tuai Rumah Lipa dalam taun 1950, begambar ba mua rumah stor tauka kantin sida di Tanu. Bediri belakang (ari kanan) Niang Umpur Anak Jana, niang Edward Adut Anak Umun, niang Chupong Anak Andok, niang Kanang Anak Eran.Duduk tengah Niang Unting Anak Giang, niang Embu Anak Jamit, niang Abang Anak Ansam. Duduk merugang
Niang Seran Anak Ensuil, niang Tedong Anak Eran.

“Ninga jaku ti dipansutka seruan nya, dia bisi siku dua lelaki kami serumah deka enggau tang ditagang apai indai sida.

“Kebuah pia laban udah ninga rita soldadu Jipun udah ngaga lubang dalam tanah ngelingi Kubu Lily, alai sida belalai deka nimbak munsuh ti datai.

“Tang nasib bendar lebuh sida Penghulu Ulin betatam di Nanga Padeh. Sida ninga burung. Sida nikal enda nyadi ngalahka Jipun.

“Nasib bendar ga bala sida Ulin enda nyadi nyerang Jipun ketegal jai burung sehari nya.

“Enti sida nyadi tentu mayuh bala sida bebadi laban soldadu Jipun sigi udah bejaga dalam lubang siang malam,” ku iya nampung kenang.

NGABAS KUBU LILY

Iya madah baru, sida serumah maya nya bisi ninga rita madahka Kubu Lily udah angus ditunu bala Ulin.

“Pagi hari siti, aki aku enggau anak petungal iya benama Unting anak Giang lalu merau ke pasar Betong deka ngabas pengamat Kubu Lily ti ditusui orang udah angus.

“Datai seduai ba pangkalan, dia seduai meda Kubu Lily agi bedau baka selama enda angus. Siku soldadu Jipun enggau siku kitai Iban ti nyadi Juru Bahasa Jipun lalu nurun ke jelatung.

“Soldadu Jipun lalu nuchulka senapang benet tauka senapang ti bisi lunga ba ujung ngagai dada anak petungal aki aku.

“Anak petungal aki aku lalu tegari kemi laban kelalu takutka diri direjang soldadu Jipun ngena lunga ba ujung senapang.

“Juru Bahasa Soldadu Jipun lalu nanya seduai ngena jaku laot, nama tuju seduai undur kili kitu, sekalika seduai bala Ulin, pia ku juru bahasa nya nanya seduai.

“Aki aku lalu nyaut. Kami duai deka ngabas rita ninga Kubu Lily udah angus ditunu bala Ulin. Kami duai ukai bala rayat Ulin, ku aki aku nyaut.

Ninga aki aku nyaut, Juru Bahasa soldadu Jipun nya lalu ngasuh seduai pulai. Aki enggau anak petungal iya lalu merau pulai baru ke rumah,” ku iya nampung kenang.

Benang Anak Giang

BETAMPIL ENGGAU JIPUN

Siti agi pengirau sida serumah ngagai soldadu Jipun maya nya ba sida ke indu, ku Tuai Rumah Lipa.

“Nya alai bala indu kami serumah kelebih agi sida ke dara maya nya enda tentu ngias diri.

“Bisi mega sida sengaja ngunsut mua ngena aruk kali lakka dipeda soldadu Jipun kamah tauka jai lebuh sida nya bisi niki ngambi pupu padi ngagai rumah panjai.

“Lebuh niki rumah panjai, dia soldadu Jipun sigi niki ke Sadau ngambi padi sepeneka ati ba Tibang.

“Meda ulah soldadu Jipun bangat nadai basa baka nya, dia sida aki aku ti serebak sama benung kering tulang lalu baum deka munuh Jipun ti datai ngambi pupu padi.

“Tang bala sida ke tuai agi enda ngasuh enggaika bala soldadu Jipun ti bukai bebalas sepeneka ati enti nemu bala sida udah mati.

“Mayuh kami serumah lalu ngelalaika padi di langkau umai laban takutka Jipun ngambi padi sida.

“Laban ti kala meda indu dara kami serumah lebuh niki rumah panjai, dia dua iku soldadu Jipun lalu bisi ati deka ngambi dua iku indu dara kami serumah ke bini.

“Laban takutka dibunuh Jipun, dia apai enggau indai seduai enda kelalu nagang. Udah seduai ka jadi enggau Jipun, dia kami serumah enda entu takut baka ke udah.

“Tambah mega, soldadu Jipun dua iku nya suah bemalam ba rumah panjai kami.

“Pia mega lebuh kami serumah bumai, seduai enggau kami serumah nurun kumai. Maya ngetau, seduai mega enggau ngema lanji. Lebuh berangkutka padi ari umai.

“Bisi dih aki tuai kami serumah maya nya agi ngena sirat. Dua iku soldadu Jipun madahka aki tuai nya seksi. Seduai nya mega rindu meda siku ini tuai kami serumah ngerat semakau ba ruai.

“Ini tuai kami serumah nya bisi nanam semakau. Soldadu Jipun dua iku nya seruran betangkin pedang lebuh bejalai sebelah ruai ke setak-setak,” tusui iya lenak.

BEDAYA IDUP

ORANG TUAI… (Kiba) bini Benang, beumur 84 taun seraya (kanan), ini bilik sepiak Tuai Rumah Lipa benama Ekah anak Engkamat, 89 taun.

Maya nya kelia ku Tuai Rumah Lipa, endang chukup merinsa laban nadai api. Kelita bisi tang minyak gas ga nadai.

Nyadi bisi ini tuai sida serumah manduk kulat getah ngulihka gas ari kulat getah. kulat getah panduk baka ke manduk sup lauk dataika ai nyau deka langkang.

“Kenu ku cherita niang aki, gas ari kulat getah nya deka mega nyadika gas api kelita tang sumbu kelita enda nakal lama laban mudah angus lalu kelalu balat asap.

“Maya Jipun ka niki rumah, bisi mega orang ke tuai nyimpan padi dalam kain digaga baka tilam.

“Maya Jipun bisi datai lalu niki ke rumah, dia sida lalu ngaga diri sakit gali ba tilam nya. Nasib bendar ga soldadu Jipun enda nemu diri ditipu.

“Siti ari cherita niang aki ti ditusui ngagai aku, ba menua kami ti disebut Bukit Pugu, ba paya kaki bukit nya bisi ditemu ai balat belenying lalu bau gas.

“Orang ke tuai kala ngambi ai nya lalu dipanduk sampaika tinggal mimit baka ti ngelala rampang nyiur ngulihka minyak nyiur. Ai ka bechampur gas nya mega deka nyadi dikena ngidupka api kelita tang sumbu kelita jampat angus lalu balat alung,” ku iya.

Nampung kenang ke ujung agi, Tuai Rumah Lipa madahka maya Jipun mega suntuk garam.

“Nyadi orang ke tuai nunu Batang Apong nyadika garam. Orang ari Ulu Skrang kala bemalam ba rumah kami nurun ke pasar Betong ketegal deka meli garam.

“Kelimpah ari nya, penatai sida mega laban deka minta garam Apong digaga kami serumah,” tusui iya.

Siti agi utai ke nyelai ku Tuai Rumah Lipa, ngenang aya iya ti benama Benang Anak Giang, ada taun 1937.

“Aya aku nya agi lansik, agi ulih macha surat kabar. Taja iya nadai kala enggau orang besekula, tang nemu macha.

JAGA MANAH MENUA KITAI

NGEMPUNG RAYAT… Tuai Rumah Lipa Nyawai

Tuai Rumah Lipa madah baru, agi mayuh kenang maya perintah Jipun ti ngasuh pengidup teguran.

“Nya kitai diatu chukup untung laban dipegai perintah ti manah sereta siruka rayat.

MAYUH PENGINGAT… Ruai rumah panjai Tanu ke diatu

“Ngena peluang tu, kitai patut temegah ati laban diau ba menua kitai ti likun.

“Jaga mih menua kitai ari sebarang pengawa ti tau mai penyarut ba pupu bansa ke diau nguan menua kitai.

“Selamat Hari Merdeka ngagai semua kitai rayat Malaysia,” ku iya nyimpul kenang diri.

Ke penerang, rumah panjai betuaika Lipa bisi 30 pintu pemanjai tang enda betampung ke alai bisi dua lumpung, setak ili 12 pintu seraya setak ulu bisi 13 pintu bilik.

Sida serumah bisi dua tiga pintu mega ngentak nyembuah laban tanah enda chukup alai betampung menya.

Nyadi kena 13 Ogos tu tadi, sida mujur ngentak rumah panjai baru sepemanjai 33 pintu. Taja pia, rumah panjai lama enda direrak laban meruan endur bala diau.

Nyadi rumah panjai baru nya ku Tuai Rumah Lipa, sekira ungkup orang ka rebak dudi, rayat majak nambah, menua mega makin besai buka.

Taba rumah panjai baru ulih dipeda ari rumah panjai lama, tisi jalai enda jauh ari stesyen bas sida di Tanu, tunga kitai ke pasar Betong nengah jalai Dabok Tanu.

RUMAH LAMA… Rumah panjai orang Tanjong Asal, Paku Saribas.

Suara Sarawak