Azizul Annuar Adenan

KUCHING: Gerempung Taekwondo Sarawak asa enggau pemutus Kaunsil Lumba Malaysia (MSN) nginsil main taekwondo ari rintai pekit dalam Lumba Malaysia (Sukma) 2022.

Presiden iya Azizul Annuar Adenan ngasaika pemutus nginsil main nya meri pangka besai lebih agi ngagai genap tim tauka nengeri ke udah ngaga penyikap ba main tu.

Iya madah, pemutus komiti pengatur nginsil main nya agi nyadi tanda tanya.

“Taja udah suah kami ngatur randau enggau Kaunsil Olimpik Malaysia (MOM) enggau MSN bekaul enggau peminta taekwondo dipasuk ba Sukma, tang kami agi puntan nerima saut.

“Kami udah ngaga sekeda peminta enggau ripot awakka taekwondo dipasuk, tang mengkang ditulak,” ku iya maya dirandau pemberita pengudah ngulu pengawa nutup Pekit Taekwondo Entarabangsa (WTF) Trofi Borneo Sarawak 2022 di Stadium Perpaduan ditu, kemari.

Tandu Azizul ke mega Presiden Taekwondo Malaysia (TM), nyema penyarut dalam tim Taekwondo Malaysia ke disebut MSN nyadika dalih nginsil taekwondo ari Sukma, nya enda betul.

“Maya aku diasuh ngiring gerempung kenyau ari 2018, aku meda nadai pekara nya nyadi (penyarut) dalam Taekwondo Malaysia.

“Aku andal pekara tu bisi utai bukai. Enti ulih aku deka nandu pekara ke disebut Datuk Abdul Karim Rahman Hamzah (Menteri Nembiak, Lumba, enggau Pemansang Dagang) sebedau tu ti madah…kelalu mayuh politik dalam lumba,” ku iya.

Iya mega ningkal sebengkah agi dawa MSN madah Taekwondo Malaysia eksklusif lalu enda nerima penatai ari gerempung taekwondo bukai.

Azizul madah, Taekwondo Malaysia seruran ngelaluka penatai sebarang atlit taekwondo dalam sebarang pekit ke diaku serakup besai.

“Kami amat-amat tebuka laban kami endang gerempung besai ke udah diaku Gerempung Taekwondo Dunya ungkup ngatur main Olimpik enggau ke bukai ba serata dunya. Kami chukup mungkur semua,” ku iya.

Nangkan ke nya, nyema dipadah tikas orang masuk pekit enda mayuh ungkup nengeri ke masuk di Sukma, Azizul mega ningkal dawa nya laban madah nya bula.

Iya madah ba Lumba Sukma sebedau ty, semua 13 nengeri nyengkaum wilayah Labuan, Putrajaya enggau Kuala Lumpur udah nganjung atlit ungkup pekit.

“Nya alai nyema dikumbai enda chukup pemkit , nya enda betul,” ku iya.

Taja betapi enggau pemar, Azizul madah sida agi mujur nganjung tim lalu menang ba Lumba Sea taun nyin kemari.

Nya alai, iya ngarapka taekwondo ulih dipasukka baru dalam Sukma enggau masuk pekit lumba ba menua bukai.

Suara Sarawak