MANAH…Esplanade Simunjan ke baru dipenyadi kemari.-Gambar RAMIDI SUBARI

SIMUNJAN: Penanggul ai di Simunjan deka teputar enti pengawa nyambung ai paip ari Kota Samarahan enggau Serian ke Simunjan tembu.

Premier Sarawak Datuk Patinggi Tan Sri Abang Johari Tun Openg madahka iya udah ngemendarka penatai ai ari Kota Samarahan neresa Jematan Batang Sadong ti semina tinggal tujuh kilometer agi deka datai ba Simunjan.

“Aku nemu, kita ditu napi penanggul ai enda deras, ai endang beguna laban diguna ninting hari baka ngaga ai kupi.

“Kitai deka nambah batang paip besai neresa Jematan Batang Sadong dikena nyambung bekal ai ke Simunjan,” ku iya.

Abang Johari bejaku munyi nya ba Program Bejadika Esplanade Simunjan di Esplanade Simunjan ditu, kemari.

Ku iya, ngambika penatai ai seruran bisi manggai taun 2030 siti agi penatai ai ngusung Simunjan deka digaga ari Serian.

“Diatu, penanggul ai di sitak Sadong Jaya, Kabong enggau Sebuyau udah tembu, lalu aku andalka penanggul ai di Gedong enggau Simunjan deka teputar manggai taun 2030,” ku iya.

Kelimpah ari nya, Abang Johari mega madahka Perintah Sarawak deka ngaga Opis Pelilih Menua Simunjan ti baru ti disikap enggau kuartes pengereja pengawa ba kandang menua nya.

Iya nangkan nya mega madahka siti agi pemansang deka dipejalaika ba Pelilih Menua Simunjan iya nya ngaga rumah ulih diempu.

Ku iya, semua pengawa tu diatur awakka ulih meri pemaik ngagai peranak besemak mungkur peranak di Gedong enggau Simunjan.

KELAI BASA…Premier Sarawak Datuk Patinggi Tan Sri Abang Johari Tun Openg (tengah) begulai enggau bala pemesai bukai ari kiba Sekretari Perintah Nengeri Datuk Seri Mohamad Abu Bakar Marzuki, Awla Dris, Datuk Seri Nancy Shukri enggau Ir. Aidel Lariwoo dibasa enggau ajat pengudah datai bejadika Esplanade Simunjan, kemari.-Gambar RAMIDI SUBARI

Suara Sarawak