TEREBAI KENYALANG TEREBAI…Onie mujur ngemegahka nama Sarawak ba Pekit Belanda Neresa Babas ke diatur ba SMK Bukit Nenas, Terengganu.

KUCHING: Siku atlit ke mega nembiak Primari Enam ari Sekula Primari (SK) Ulu Entabai, Julau iya nya Shakira Onie anak Henry,12, mujur nyadi champion ba Pekit Belanda Neresa Babas Renggat Nasional ke diatur ba Sekula Sekondari (SMK) Bukit Nenas, Terengganu kena ke 4 nyentuk 7 Ogos tu.

Siku jurulatih atlit ke mega pengajar SK Ulu Entabai, Pengajar Afdal Shyarmeezan bin Sepawi madah, iya endang ngembuan pengarap ke besai ngagai Onie ulih besemekih sereta ngalahka bala atlit bukai ari selampur menua Malaysia ba pekit nya.

Ku Afdal, iya nemu pengelebih enggau penau ti dikembuan Onie ba pekit nya laban sebedau tu Onie suah menggi gelar champion ba pekit ke sebaka ba mayuh bengkah renggat.

“Aku chukup temegah ati meda pemujur Onie ba pekit tu laban iya mih nembiak ti keterubah ari SK Ulu Entabai ke mujur dipilih nyadi pengari Sarawak ba pekit tu ungkup kategori 12 taun ke baruh sereta mujur ngalahka 79 iku bala atlit bukai ari selampur menua tu.

TABI PUJI…Shakira Onie anak Henry mujur ngempu gelar champion ba Pekit Belanda Neresa Babas Renggat Nasional ungkup kategori 12 taun ke baru sereta ngalahka 79 iku bala atlit bukai ari selampur menua Malaysia.

“Aku berengkah ngelatih sereta nelebaka Onie ba lumba tu lebuh iya agi ba Primari 3 suba nyentukka diatu lalu lebuh sekula berengkah dibuka bulan Mac tu tadi, aku berengkah ngelatih sereta nyikap sida genap hari kena napi pekit ke besai tu.

“Kebendar iya, projek tu berengkah dipejalaika aku ba taun 2019 suba lalu ba taun 2022 tu, semua asil titik peluh aku ngelama tu ngadaka buah nengah pemujur Onie ngempu gelar champion ba pekit tu.

“Endang juluk ati aku deka meda lalu mandangka penau nembiak ba menua pesisir ba pengawa lumba ngagai mata menua luar lalu ba maya ke sebaka ulih ngangkatka nama manah sekula menua pesisir kelebih agi SK Ulu Entabai.

“Naka diatu, bedau bisi perambu deka nganjung Onie ngagai tikas ke tinggi agi baka ba renggat entarabansa laban Kaunsil Lumba Sekula Malaysia (MSSM) tu mih renggat ke pemadu tinggi ungkup nembiak sekula primari.

“Aku ngarapka Onie ulih ngindangka sayap iya terebai tinggi sereta jauh agi ba pekit tu lebuh iya nyambung pelajar sekula diri ngagai sekula sekondari enggau pengudah nya.

“Besai pengandal ati aku ngarapka jurulatih iya ke baru ila ulih ngerembai sereta ngansah penau iya ba pengawa lumba tu ngambika iya ulih nyadi atlit ke mujur ngangkatka nama manah Malaysia ba mata dunya.

“Pemujur Onie tu ke bendar iya endang ari pengeransing ati iya empu ti bebendar belatih genap hari sereta ari sukung semua bala pengajar ba SK Ulu Entabai ti semampai besaup nyikap iya ba pekit ke besai tu,” ku padah Afdal.

Ku iya madah, bekaul enggau isu Onie nadai bekenaka kasut maya ngambi bagi ba pekit nya ensana, nya endang ari pemutus enggau penyamai Onie empu lebuh iya milih enda bekenaka kasut laban bisi dua pasang kasut udah disediaka ungkup iya.

Trek endur pekit nya dipeda chukup lichin lebuh raban sida ari Kontijen Sarawak meresa palan nya ba hari sebedau pekit nya dipejalaika lalu kasut ke endang diungkup ngambika bisi dikena Onie ba pekit nya enda engkeman dikena dia.

“Maya ke meresa trek nya, aku endang semampai belematika pengelikun trek nya ngambika likun ditujah bala atlit kena nyeliahka pekara ke enda manah nyadi.

“Taja pia, trek nya mayuh nengah jalai ti berumput sereta tanah kuning lalu aku ke nyadi jurulatih iya tetap bebasaka pemutus ke diambi Onie sekalika iya keran bekenaka kasut tauka enda.

“Pemutus ke diambi iya nya endang ari penyamai iya empu lalu aku enggai mejal iya ngena kasut laban nya ulih nyeruga pengering runding iya ti ulih ngasuh iya enda meri perati ke chukup ngagai pekit nya.

“Aku semina malut kaki iya ngena tap kena nyeliahka kaki iya ari telih lalu ba pekit ke sebaka mega, siku agi atlit lelaki ari SK Ulu Entabai, Eldysean Luyoh mujur ngempu penuduk lumur 21 ungkup kategori 12 taun ke baruh,” ku penerang ari Afdal.

Sepenyampau 16 buah kontijen ari selampur menua Malaysia ngambi bagi ba pekit nya lalu ba genap bengkah kategori lumba, genap menua patut nganjung lima iku bala atlit sida.

Penerang ari Pengajar Afdal madahka Onie tu siku nembiak Primari 6 ke mega siku Kepala Pengawas Indu ba SK Ulu Entabai ke diau bemalam ba buding sekula.

Iya diau begulai enggau ini iya ba Rumah Jimmy, Nanga Bayu, Pakan lalu apai iya gawa deriba ba mengeri Kuching.

Dulu ari nya, ba media rama bala netizen balat muji penegar Onie belanda neresa babas taja nadai bekasut nengah siti video ke dikunsika siku penguna ba media rama.

TERIMA KASIH PENGAJAR…Onie begambar kenang enggau Pengajar Afdal ke enda nemu leju ngelatih sereta nyikap iya ba pekit nya.

Suara Sarawak