AUM PEMBERITA…Ikmal Hisham (lima kiba) bejaku ba aum pemberita pengudah nyuaka Pingat Jasa Malaysia (PJM) di sebuah hotel ditu kemari.

KUCHING: Opis Menteri Pengelikun Malaysia seruran ngemeratka pengelantang enggau pekara pemun raban veteran soldadu di menua tu.

Sapit Menteri Pengelikun Malaysia Datuk Sri Ikmal Hisham Abdul Aziz madahka opis menteri bisi ngatur sekeda seruri ngagai pekara nya dalam meri pemaik ngagai raban veteran.

“Entara pekara ti dikemanah iya nya ngelanjarka timpuh bayar pinchin ngagai balu ti jadi enggau veteran ATM pengudah sida badu gawa nyentukka umur veteran nya manggai 80 taun.

“Pekara tu udah berengkah kena 1 Januari 2022 ke alai Opis Pekara Veteran ATM udah ngatur bayar ngagai penerima ti udah dikelala sida,” ku iya.

Ikmal Hashim bejaku munyi nya rambau aum pemberita pengudah nyuaka Pingat Jasa Malaysia (PJM) di sebuah hotel ditu kemari.

Ku iya, kelimpah ari nya, opis menteri mega udah numbuhka Panel Penyanding Penemu Aku Veteran awakka ulih baum dalam ninggaka peminta raban veteran.

Iya madahka, aum panel tu keterubah diatur kena 28 Julai 2022 apin lama ngujungka sida nerima urung 19 bengkah peminta.

“Aum nya agi benung bejalai lalu deka diatur belama,” ku iya.

Entara bukai, ku iya, sida mega benung meri perati ngagai Raban Pengatur Supreme Opis Menteri Pengelikun bekaul isu nyeririska pinchin enggau beri bayar ninting bulan ngagai veteran ATM ti Nadai Bepinchin.

Ku iya, pekara nya nyengkaum beri elaun ngagai penerima PJM.

Iya nangkan nya madahka, opis menteri seruran deka ngambi peluang ngatur aum awakka ulih ninga penanggul ti ditapi raban veteran awakka penangul sida ulih terus dibai ngagai bala tuai enggau diperundingka Gerempung Veteran.

“Entara program ti kala diatur baka Bengkel Ngenegapka Pekara Veteran ATM kena 10 Ogos tu tadi.

“Bisi pekara bekaul dibantaika dikena ngemanahka sereta nyukung opis menteri dalam mantu raban veteran di menua tu,” ku iya.

Suara Sarawak