ACP AHSMON BAJAH

KUCHING: Penemuai Tuai Polis Pelilih Kuching, ACP Ahsmon Bajah ngagai Padang Bilun Entarabansa (LTAB) Kuching lemai ensana betuju dikena ngedutka agi kaul entara dua buah ejensi nya.

Penerang ari Indu Opis Polis Pelilih (IPD) Kuching madahka ba penemuai nya, Ahsmon disempulang bala tuai bidang enggau tuan IPD Kuching.

Ku penerang nya, penatai raban nya ensana diterima penuh basa raban ari Ejensi Pengelikun LTAB Kuching.

“Penemuai Ahsmon ngagai padang bilun nya kena ngedutka agi kaul entara raban Polis Pelilih Kuching enggau semua Ejensi Pengelikun LTAB Kuching ke nyaga pengelikun palan nya.

“Tuju penemuai nya mega kena ngelala sekeda kandang endur dalam LTAB nya ke patut diberi perati lebih kena nyaga pengelikun endur nya kelimpah penyampau tubuh raban ke nyaga palan nya enggau langkau pengelikun dia,” ku padah penerang nya.

Ba penemuai nya mega, Ahsmon diberi licha bekaul enggau pengelikun ba LTAB ari Tuai Administrasyen Pengelikun Penerebai LTAB Kuching, ASP PB Roslan bin Majid.

Sama mendingka licha nya Tuai Balai IPD Kuching, bala tuai bidang IPD Kuching, bala pegawai Imegresen enggau raban Servis Penyelamat Penusah Angus Padang Bilun (AFRS).


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak