MERUAN NYUKUNG…Premier Sarawak Datuk Patinggi Tan Sri Abang Johari Tun Openg benung betabi enggau bala pemekit maya datai nutup ‘Sarawak Borneo Cup International Taekwondo (Wtf) Championship’ di Stadium Perpaduan Negeri, kemari. -Gambar RAMIDI SUBARI

KUCHING: Perintah Sarawak seruran nyukung main taekwando taja pan main tu nadai dirintaika dalam Lumba Malaysia (Sukma) ti deka datai.

Premier Sarawak Datuk Patinggi Tan Sri Abang Johari Tun Openg madahka iya asa laban main nya dikinsil ari Sukma 2022.

“Rambau Sukma 2018, taekwondo bisi dipekitka, udah tentu Sarawak asa laban taekwando dikinsil ari Sukma (2022).

“Tang kitai (Perintah Sarawak) deka terus nyukung pemansang main taekwondo tu,” ku iya lebuh bejaku ba program nutup ‘Sarawak Borneo Cup International Taekwondo (Wtf) Championship’ di Stadium Perpaduan Negeri, kemari.

Abang Johari ti mega pemungkal Gerempung Taekwondo Sarawak nyemetak madahka sesebengkah lumba ti dirintaika dalam pekit, lumba nya mesti ditanka laban nya siti ari chara ngemansangka lumba nya.

Ku iya, taekwondo enda ulih semina dikinsil ari sesebengkah pekit laban nya ulih nyadi ngagai main tauka lumba bukai.

“Nyema pekara tu nyadi, mar ungkup kitai ngemansangka lumba, kitai mesti bisi polisi ti tegap ngagai pekara tu.

“Nya alai, aku ngarapka polisi lumba menua ulih dipansik baru baka taekwondo ti seruran dirintaika dalam Sukma,” ku iya.

Taekwondo siti ari tiga bengkah lumba ti dikinsil ari Sukma ba taun 2017, kelimpah main angkat berat enggau sepak takraw.

Berebak enggau nya, Abang Johari ngelalau raban nembiak ngambika ulih ngambi bagi dalam main taekwondo laban main tu beguna ngagai pemansang penau nembiak rebak baru.

Iya madahka, bisi dua eleman beguna dalam pemansang penau nembiak rebak baru iya nya penyikar enggau disiplin.

Kelimpah ari nya, iya madahka orang ti bekaul dalam main taekwando tu ngembuan polisi, ditangkan enggau integriti ti tinggi.

“Taja pia, disiplin mesti bisi pemun ti tegap baka main silat ti ngembuan kuda ti kering…elemen ti beguna ngagai penau orang awakka ulih ngemansangka menua.

“Sempama jaku, enti kitai deka meda menua ke mua, peda meh ngagai kualiti nembiak diatu, enti sida berdisiplin enggau mansang ke mua, menua diau likun.

“Tu mai reti Sarawak diau ba jari ti likun ari nembiak rebak baru diatu,” ku iya.

Sama bisi datai Sapit Menteri Nembiak, Lumba enggau Pemansang Dagang Datuk Gerald Rentap Jabu, Presiden Taekwondo Malaysia (TM) enggau Gerempung Taekwondo Sarawak Azizul Annuar Adenan sereta Tuai Pemesai Eksekutif Kaunsil Lumba Sarawak (SSC) Morshidi Fredrick.

Suara Sarawak