NGABAS PESAKIT… Datuk Seri Hishammuddin Tun Hussein bejalaika pengawa ngabas pesakit pengudah bejadika Poliklinik Kem Penrissen, Kuching kemari. -Gambar GHAZALI BUJANG

KUCHING: Penumbuh Poliklinik Pengerai Soldadu Malaysia (ATM) ti keterubah ba Kem Penrissen Kuching deka meri mayuh meri pemaik ngagai raban tu kelebih agi ngagai raban veteran ATM.

Menteri Kanan Pengelikun Malaysia Datuk Seri Hishammuddin Tun Hussein madahka poliklinik ti beungkus RM28.4 juta nya deka meri pemaik pengerai ngagai 12,000 iku raban ATM, ruang bilik enggau veteran ATM di Kuching enggau palan besemak.

“Poliklinik tu sebagi ari aset menua lalu aku andalka ari inisiatif tu sukung moral, pemerani enggau ulah benung sida gawa ngagai menua meruan teguh.

“Aku gaga meda poliklinik tu udah tembu laban ulih meri pemaik kelebih agi raban veteran baka siku veteran ti dipeda aku tadi benung nuchi tungkul sengayuh iya, enti ba sepital peribit ungkup nuchi tungkul sengayuh tu enda murah,” ku iya.

Hishammuddin bejaku munyi nya ba aum media pengudah Bejadika Poliklinik Pengerai ATM di Kem Penrissen Kuching ditu kemari.

Ku iya, bisi tiga buah agi poliklinik deka digaga ba Malaysia iya nya di Johor, Terengganu enggau Kedah.

“Aku andalka raban peribit baka sektor dagang minyak enggau gis ulih ngatur tanggungpengawa rama korporat (CSR) ngagai poliklinik baka meri bantu nyikap penuh kereban pengerai ti diguna ditu,” ku iya.

Poliklinik nya berengkah digaga kena bulan November 2017 ngembuan servis lutur pakar berubat enggau lutur pakar ngeli nyengkaum perengkaguna pesakit luar.

Entara servis ti bisi disediaka ba poliklinik nya nyengkaum Klinik Soldadu, Klinik Pengerai Ruang Bilik, Unit Sakit Ngenyit, Balai Beputung, Wad Pesakit Dalam, Palan Hemodalisis, Unit Rehabilatasyen, Servis Ngatur Ngeli enggau Servis Pengerai Mensia Mayuh.

Kelimpah ari nya, palan tu mega disikap enggau makmal berubat, farmasi enggau palan x-ray.

Sama bisi datai Panglima Soldadu Langit Malaysia Jeneral Tan Sri Datuk Sri Affendi Buang, Panglima Soldadu Darat Malaysia Jeneral Tan Sri Datuk Sri Zamrose Mohd Zain enggau bala bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak