BEJADI…Premier Datuk Patinggi Tan Sri Abang Johari Tun Openg (mua tiga kiba) begulai enggau balat bukai nuatka tambai kelai bejadika program Kembara Merdeka Keluarga Malaysia 2022 ba Begunan DUN di Petra Jaya, Kuching.kemari : Gambar Mohd Alif Noni

KUCHING: Lebih 30 buah entukar ari mayuh bengkah ejensi nyereta program ‘Konvoi Kembara Merdeka’ Malaysia Sebilik (KMKM) neresa 33 pelilih menua di serata Sarawak.

Direktor Opis Pemadah (JaPen) Sarawak Jaafar Jantan madahka KMKM diatur JaPen Sarawak beserimbai enggau hari Ngintu Bulan Kebangsaan Renggat Nengeri Sarawak.

“Penyauh pejalai sida urung 4,025 kilometer berengkah ari Telok Melano ke Lawas, tang udah nya sida deka pulai baru ke Betong kena 31 Ogos.

“Maya nya ila, kitai sama deka berami ngintu Bulan Kebangsaan di Pelilih Menua Betong,” ku iya.

Jaafar bejaku munyi nya rambau jaku pemuka Pengerami Ngintu Bulan Kebangsaan Enggau Ngitau Jalur Gemilang Renggat Nengeri 2022 di Dun ditu, kemari.

Iya nangkan nya, ngelalau mensia mayuh ngambika ngias rumah, opis, sekula enggau palan bukai ngema Jalur Gemilang nyadika kelai penyerakup enggau penaluk ngagai menua.

Ku iya, pengawa nya ulih mantaika pesan ti manah, betul enggau semangat sayauka menua, lalu ukai berita ti ulih mambarka penyerakup semua orang.

Berebak enggau nya, iya mega muji Program Bejalai Teguh Malaysia Sebilik ti diatur ba Waterfront Kuching ngusung Dun pagi kemari siti pekara ti manah.

Ku iya, aktiviti ngaul Malaysia Sebilik besai reti ngagai Sarawak laban ulih nanam semangat patriotik ngagai mensia mayuh.

“Taja pan penyauh pejalai tadi nadai datai satu kilometer, tang juluk ati ulih dijapai iya nya nerenak semangat begulai sereta beserakup.

“Nya nyemetak ngelaika lambang penyerakup ti bisi dalam Malaysia Sebilik di Sarawak,” ku iya.

Suara Sarawak