DATUK SRI WONG SOON KOH

KUCHING: Parti Sarawak Bersatu (PSB) deka nuntut See Chee How ngelepaska pangku pengawa nyadi Kaban Kunsil Nengeri (Adun) Batu Lintang.

Presiden PSB Datuk Sri Wong Soon Koh madahka pekara nya entara sempekat ti ditanggam Chee How enggau PSB sebedau dipilih nyadi chalun PSB di Dun Batu Lintang.

“YB See (Chee How) patut udah nemu semua sempekat baikka lebuh bejaku enggau betulis ti diberi iya ngagai PSB sebedau dipilih nyadi chalun PSB di Dun Batu Lintang.

“Nya nyengkaum sempekat mayar pampas ngagai parti enti iya milih nyurutka diri pengudah ngempu penuduk nengah chalun PSB,” ku iya dalam siti penerang media kemari.

Ku Soon Koh, sempekat tu mega mungkur ngelepaska pangku pengawa nyadi Kaban Kunsil Nengeri (Adun) enti iya nyurutka diri ari PSB pengudah mujur ngempu penuduk.

Tandu iya, Chee How siku luyar lalu iya nemu komitmen betulis nya sebedau diberi surat chiri nyadi chalun ngarika PSB dalam Pengawa Bepilih Besai Nengeri (PRN-12) suba.

Nya alai, iya nyemetak madahka ari sukut polisi PSB deka bejalaika semua atur ti patut ngagai pemutus ti digaga Chee How.

Dulu ari nya, Soon Koh madahka PSB udah nerima surat Chee How nyurutka diri ari PSB.

Iya nangkan nya madahka diri asa enggau pemutus Adun Batu Lintang nya.

Penerang pasal Chee How nyurutka diri ari PSB dibantaika Speaker Dun Sarawak Tan Sri Mohamad Asfia Awang Nassar pagi kemari ti madahka iya nerima surat ari Chee How bekaul pekara nya kena Hari Lima (12 Ogos) tu tadi.

“Bekau ari nya, iya diatu nyadi Adun Independent,” ku iya rambau aum pemberita di Dun, kemari.

Asfia mega madahka penuduk raban parti dalam Dun Sarawak bisi berubah iya nya Gempung Parti Sarawak (GPS) 76 penuduk, PSB tiga penuduk, Parti Tindakan Demokratik (DAP) dua penuduk enggau Independent siti penuduk.

Berebak enggau nya, dalam siti penerang surat kabar menua, Chee How madahka diri enggai nimbal pekara tu dulu tang deka ngaga aum pemberita bekaul pekara nya kena Hari Dua tu (16 Ogos).-INDUN SILONG

Suara Sarawak