Datuk Julaihi Narawi enggau Rodziah Mohamad benung beratika sambung paip ke bisi dipandang ba ruai pemandang pengudah bejadika Program Penutup Retreat Bekal Ai Sarawak 2022 di Damai Beach Resort di Santubong, kemari. -Gambar Mohd Alif Noni

KUCHING: Resolusyen deka nyapai juluk 100 peratus rayat ngasaika bekal ai beresi di selampur Sarawak patut diseriris ngena teknologi pemadu baru sereta ngira bajet ti diagih perintah.

Menteri Utiliti Enggau Telekomunikasyen Datuk Julaihi Narawi madah resolusyen nya patut nitihka penatai belanja ti disediaka perintah seriris enggau Strategi Pemansang Lepas Covid-19 (PCDS 2030).

“Dalam ngatur resolusyen awakka penanggul rayat bulih bekal ai beresi teputar kitai endang begunaka belanja ti besai, enti agih belanja chukup baru pengawa ti deka digaga ulih dipejalaika.

“Kelimpah ari nya, resolusyen tu mesti bisi ngena tekonologi pemadu baru ke alai teknologi nya mega patut engkeman enggau bajet ti dikemisi perintah laban enti resolusyen bisi tang ngena ungkus belanja ti besai pan pengawa nya enggai nyadi dipejalaika enti kitai nadai bajet,” ku iya.

Julaihi bejaku munyi nya rambau bejadika Program Penutup Retreat Bekal Ai Sarawak 2022 di Damai Beach Resort di Santubong, kemari.

Ku iya, penatai ai mega patut dijaga ngambika selampur menua Sarawak sama ulih ngasaika pemaik.

“Penatai ai tu mesti diintu meruan awakka nadai nyadi penanggul tauka ngachau pengawa meri bekal ai beresi ngagai kitai dudi hari.

“Siti ari resolusyen pemadu engkeman dalam pengawa meri bekal ai beresi diatu iya nya Sistem Grid, ti nyadi resolusyen timpuh panjai bekal ai di serata Sarawak,” ku iya.

Kemari bisi lebih ari 20 resolusyen ari lima buah ejensi bekal ai baka Kaunsil Ai Kuching (KWB), Laku Management Sdn Bhd, Kaunsil Ai Sibu (SWB), Opis Bekal Ai Menua Pesisir (JBALB) enggau opis menteri bisi dibantaika ngagai Julaihi.

Iya rambau ditanya madahka nama bagi resolusyen nya madahka deka meda dulu sebedau ulih meri pemutus tauka madah ngagai pemberita.

“Nitihka peneleba, kunsi, guna teknologi pemadu baru enggau ke bukai, aku pechaya nya (resolusyen) ulih dipejalaika ngagai sukut industri meri bekal ai enda lama agi.

“Pekara nya mesti diperati dulu, laban aku deka berandau enggau bala pemesai ti patut kelimpah berandau enggau pemesai ari opis menteri baikka engkeman dikena nitihka peminta tauka enda.

“Diatu, pekara pemadu beguna iya nya juluk ati perintah ti deka meri bekal ai beresi ngagai selampur Sarawak,” ku iya.

Udah nya iya madahka, pengawa meri bekal ai beresi tu tetap dipejalaika belama laban nya nyadi sebagi ari agenda pemadu besai perintah menua.

Sama bisi datai Sekretari Mendam Opis Menteri Utiliti Enggau Telekomunikasyen Datuk Dr Alice Jawan enggau Menijar Besai KWB Rodziah Mohamad.

Suara Sarawak