KELAI PENGERAMI…Premier Sarawak Datuk Patinggi Tan Sri Abang Johari Tun Openg (dua kanan) nyain plak kelai bejadika Esplanade Simunjan seraya dikemataka ari kiba Ir. Aidel Lariwoo, Sekretari Perintah Nengeri Datuk Seri Mohamad Abu Bakar Marzuki, Datuk Julaihi Narawi, Awla dris enggau Datuk Seri Nancy Shukri.-Gambar RAMIDI SUBARI

SIMUNJAN: Perintah Sarawak ngemendarka agih belanja RM79 juta dikena ngaga selapat nagang tanah tusur ba tebing sungai Simunjan.

Premier Sarawak Datuk Patinggi Tan Sri Abang Johari Tun Openg madahka selapat ti deka digaga nya deka dipejalaika dalam tiga renggat.

“Projek tu digaga ba baruh Ejensi Pansang Wilayah Bersepadu Samarahan (IRSDA), lalu deka berengkah digaga enam bulan agi.

“Aku empu deka datai kitu dalam timpuh enam bulan agi meda pejalai projek nya,” ku iya.

Abang Johari bejaku munyi nya ba Program Bejadika Esplanade Simunjan di Esplanade Simunjan ditu, kemari.

Ku iya, pansik ngaga selapat nya udah dipansik iya nengah Opis Parit enggau Entali Ai (DID) ngambika tegap enggau enda rubuh.

Dulu ari nya, Abang Johari udah ngemendarka agih belanja tambah RM3 juta dikena ngaga perabung Esplanade Simunjan ba palan tebuka.

Pekara nya, ku iya, bekau ari peminta Adun Simunjan Awla Dris ti deka ngaga perabung ba palan tebuka Esplanade Simunjan ungkup guna mensia mayuh ti datai kia.

Iya madahka, lebuh selapat enggau pengawa nyeruri Esplanade Simunjan udah tembu digaga, kandang menua di pasar Simunjan deka manah agi.

Sama bisi datai Menteri Dagang Temuai, Seni enggau Main Asal (Motac) Datuk Sri Nancy Shukri, Menteri Utiliti enggau Telekomunikasyen Datuk Julaihi Narawi, Adun Simunjan Alwa Dris enggau ke bukai.

-abis-

Suara Sarawak