KUCHING: Rang Undang-Undang (RUU) Konstitusyen (Ubah) (No 3) 2022 bekaul atur mali merejuk parti dipelabaka ulih diterit tengan bulan September tu.

Menteri ba Opis Menteri Besai (Undang-Undang enggau Parlimen) Datuk Seri Wan Junaidi Tuanku Jaafar madahka RUU nya udah dibantaika ngagai Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah.

Ku iya, Agong baru pulai ari pengawa nemuai seraya gawa ba menua Turkiye apin lama ke alai RUU nya udah dibantaika dua hari ti udah lalu.

“Tuanku bisi nanya aku pasal RUU nya, kami udah meri, nya alai kitai meri awak seminggu tu ngagai Tuanku meda RUU nya dulu.

“Nyema bisi pekara ti patut diterangka, Tuanku deka ngangauka Luyar Menua (Tan Sri Idrus Harun) bagi nerang silik pasal RUU nya.

“Nya alai, aku pechaya RUU nya ulih dikena minggu kedua bulan baru,” ku iya.

Wan Junaidi bejaku munyi nya rambau aum pemberita Program Kenduri Rakyat di Kampung Bako Hilir ditu kemari.

Ku iya, RUU tu mesti dipejalaika nengah dua proses agi.

“Keterubah dibaruh Pekara 66 Konstitusyen Perintah Besai iya nya dibantaika ngagai Yang di-Pertuan Agong ti benung digaga diatu.

“Udah nya, RUU deka diberi pulai ngagai Opis Luyar Menua enggau opis aku dikena kitai ngaga peminta baru ngagai Tuanku ngena RUU nya,” ku iya.

Sebedau tu, RUU nagang pengari rayat merejuk parti dikemendarka nengah majoriti undi dua pertiga kaban Kunsil Rayat kena 28 Julai 2022 ti dibantaika Menteri Besai Datuk Seri Ismail Sabri Yaakob.

Suara Sarawak