Produk wi ti dijual Sandra.

KUCHING: Seriris enggau polisi Perintah Nengeri ti deka menua tu mansang ngagai ekonomi digital, siku orang dagang Sandra Trinata Kolarensius Sugeng, 35, enda tinggal ngelakuka produk dagang iya ba media rama.

Indu bansa Bidayuh ari Kampung Serikin, Bau tu nguna pelasar media rama ngayanka produk wi ti dijual iya ba kedai iya empu dikumbai Nang Dee Recources.

“Aku bejual produk ti digaga ari wi baka tikai, bakul, bangku enggau ke bukai nyengkaum nyual baju bechura barang lama dalam online.

“Pengawa tu ulih dikereja aku nengah bantu inisiatif Sarawak Rural Broadband Network (MySRBN) tauka Saluran-MySRBN ti diberi perintah pechuma ngagai rayat ba menua pesisir,” ku iya madah ngagai Suara Sarawak, apin lama ke udah.

Sandra madahka pengawa masang Saluran-MySRBN ba kedai iya udah mantu ngurangka ungkus belanja bil telefon enggau ngemuntangka atur bebayar barang dagang.

“Enti suba, aku nanggung ungkus bil telefon ti besai laban deka bekangau bala pemeli datai kitu enggau pemekal pasal barang dagang, tang diatu enda agi laban aku ulih ngangauka sida nengah aplikasyen WhatsApp enggau Facebook.

“Kelimpah ngemuntangka pengawa ngelalukuka produk ngagai pemeli ba media rama aku mega enda ibuh bebayar bil telefon ti tinggi agi nengah Saluran-MySRBN,” ku iya.

Ku iya, peranak di menua sida mega ulih ngelimatka ungkus kad kredit ‘prabayar’ pengudah servis nya dipasang dia.

“Mayuh raban pemeli ngusung kedai aku udah sida meda produk wi ti dipandangka aku ba media rama.

“Diatu, kami ulih bekangau enggau bala bakih sebarang maya kelebih agi ruang bilik ti jauh ba mengeri,” ku iya.

Taja pan servis nya bisi maya napi penanggul enda deras bekau ari mayuh pengguna, Sandra madahka iya berasai gaga laban produk wi iya majak laku sereta nambah nyentuk diatu.

“Aku ngarapka mayuh agi Saluran-MySRBN dipasang ba menua kami awakka servis majak deras sereta jampat.

“Internet tu balat beguna ngagai kami di menua pesisir ngulihka penerang enggau ngelakuka asil produk ti dijual,” ku iya.

Saluran-MySRBN sebagi ari jalai pemutar ti dipejalaika Perintah Sarawak nengah Kaunsil Multimedia Sarawak (SMA).

Pemutar sementara tu nyadi sebagi ari pengawa ngerandang ekonomi digital menua dikena ngerapitka takah digital entara rayat di mengeri enggau menua pesisir.

Sandra Trinata Kolarensius Sugeng ngayanka asil produk wi ari menua iya.

 

Sandra ngayanka produk wi.

Suara Sarawak