TERIMA KASIH…Raden Sigit Witjaksono (kanan) nyuaka tepa ngagai Tuai Pegawai Eksekutif New Sarawak Tribune enggau Suara Sarawak Dr Jeniri Amir pengudah tembu pengawa penemuai basa ngagai opis konsulat nya, kemari. -Gambar RAMIDI SUBARI

KUCHING: Konsulat Jeneral Republik Indonesia di Kuching benung ngelanggur sebengkah sistem ti berurun enggau maju ba pengawa ngambi pengereja pengawa ari menua sida di menua tu.

Konsul Jeneral iya, Raden Sigit Witjaksono madah, sistem begulai nya dikena matau rayat iya ke gawa di Sarawak ari sektor besai dataika renggat pemungkal lebih agi bekaul dokumentasyen.

“Entara pemar ditapi ditu nya kami bisi mayuh peranak Indonesia ke bisi penanggul bekaul dokumen.

“Bisi sekeda nya nadai dokumen enggau bisi sekeda udah enda ulih dikena.

“Nya pemar ditapi kami ngaduka sida enti penusah enda disadag nyadi baka penusah aksiden laban lebuh meresa data tang nadai rikod data sida,” ku iya ba randau khas enggau Suara Sarawak, kemari.

Ku iya, inisiatif nya nentuka genap peranak Indonesia ti tama ke Sarawak ukai semina pengereja tang mega temuai enggau nembiak bisi dokumentasyen ti betul.

“Enti nadai dokumentasyen, ukai semina ngemediska sida aja tang mega pengaji sida, ejensi bekaul baka polis, imigresyen enggau kami ba konsulat ngaduka penanggul ditapi sida.

“Dokumen tu beguna amat lebih agi lebuh ngaduka pengawa nganjung sida pulai ke Indonesia.
“Naka diatu, kami bisi ngeluarka Surat Pejalai Pasport (SPLP) iya nya pas khas sekali aja ungkup rayat kami pulai ke Indonesia enggau nadai sebarang penanggul,” ku iya.

Dulu ari nya, Raden nerima penemuai basa ari New Sarawak Tribune enggau Suara Sarawak betuaika Tuai Pegawai Eksekutif iya Dr Jeniri Amir begulai enggau Editor Eksekutif Suara Sarawak Rohana Wahid, Editor Pengatur Pengawa New Sarawak Tribune Aden Nagrace enggau Eksekutif Pemansang Dagang, Dorge Rajah.

Ba penemuai basa nya, Raden mega bekunsika perambu, pelin enggau pemansang indu mengeri baru Indonesia, Nusantara di Kalimantan Timur.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak