DATUK HASBI HABIBOLLAH

LIMBANG: Sitak utara Sarawak mega enda dikelaung ari pemansang ngambi ngemujurka juluk nyadi menua maju manggai taun 2030.

Sapit Menteri Pemansang Menua Pesisir, Datuk Hasbi Habibollah madah, pekara tu nyata dipeda lebuh sekeda projek besai benung dipejalai diatu.

“Limbang mega nerima mayuh agih belanja dikena ngemanah infrastruktur ungkup pengelantang rayat ditu nyengkaum projek ngaga Jematan Sungai Limbang Kedua sereta tebing sungai Limbang pemadu panjai di Sarawak.

“Pia mega, projek ngaga Opis Begulai Limbang, nyeleti jalai Kampung Ipai ngagai Kampung Pendam penyauh 13 kilometer (km), projek jalai ngagai Mentawai penyauh 27km ngagai Bukit Buda enggau ke bukai,” ku Hasbi.

Kaban Parlimen Limbang mansutka jaku nya ba Pengawa Bejadika Surau Darul Ehsan Tun Abang Haji Openg Kampung Bunga Raya di Limbang ti dipenyadi Premier Sarawak Datuk Patinggi Tan Sri Abang Johari Tun Openg, ensanus.

Ku iya, gaya pemansang pelilih nya deka berubah pengudah semua projek nya tembu ila kelimpah nyungkak sektor ekonomi enggau dagang temuai peranak dia.

Ngelansa pasal surau beungkus RM750,000 nya, Hasbi madahka surau ti lama nya entara surau pemadu tuai di Limbang didiri kenyau ari taun 1969 mesti digaga baru laban udah lama enggau enda likun dikena agi.

“Tiang surau nyau majak repuk diempa indu sampuk ngujungka komuniti dia irauka surau nya enda likun dikena agi lalu ngaga pemutus ngaga baru.

“Di baruh Projek Rayat, Premier Sarawak setuju ngagihka belanja dikena ngaga baru surau nya dataika surau baru udah didiri ari penyiru iya,” ku iya.

Udah nya, surau diberi nama Surau Darul Ehsan Tun Abang Haji Openg.

Kelimpah ari nya, Abang Johari meri terima kasih ngagai komuniti Limbang laban nama surau nya ngangkatka nama niang apai iya ke kala gawa nyadi Pegawai Opis Pelilih Limbang suba.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak