GUSTIN JENANG

KUCHING: Apai jaguh angkat berat menua, Gustin Jenang berasai chukup gaga meda pemujur anak iya.

Pia mega, iya madahka midul emas dipenggi anak iya, Bonnie Bunyau nya tepa hari pengada ke-55 iya kena 10 Ogos tu.

“Enda ulih tepansutka leka jaku enggau chukup gaga tang dalam ati, aku nyebut tabi puji nuju nuan anak,” ku Gustin.

Ku Gustin ke mega asal ari Kpg Mawang Baru, Serian, sida sebilik bisi meda anak iya bepekit ba televisyen.

Dulu ari nya, Gustin ngarika sida sebilik deka meri terima kasih ngagai semua rayat Malaysia laban udah meri sukung sereta besampika pemujur anak iya.

Bonnie mujur ngerikod poin pemadu tinggi iya nya 154.6 nengah angkat berat 220kg ketiga kali.

Iya mega nempa rikod baru pengudah lepas ba kategori keterubah enggau angkat berat sereta kedua enggau berat 216kg.

Pekit Lumba Komanwel nya diatur ba Birmingham, United Kingdom berengkah ari 28 Julai tu tadi nyentuk 8 Ogos tu.

Kontinjen menua Malaysia serak merambu nyapai enam iti midul emas lalu naka tu udah bulih empat midul emas nyengkaum ke udah diulih Bonnie.

Ungkup penemu, kelimpah ari Bonnie siku agi anak lelaki Gustin mujur ngenampakka nama menua Malaysia ba tikas entarabansa iya nya Bryan Junency.

Kemari, Bryan bela mujur bulih siti midul emas enggau siti midul pirak ba Pekit Angkat Berat Para Asean (APG) ke-11 diatur ba Solo,Indonesia.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak