SEPENEMU… Ketuai Parti Sedar Rakyat Sarawak (SEDAR), Datuk Othman Abdillah, Parti Bansa Dayak Sarawak Baru (PBDSB), Bobby William enggau Parti Aspirasi Rakyat Sarawak (ASPIRASI), Lina Soo di Kuching sereta bala bukai mandangka tanda puji ngagai pekat Gagasan Rayat Sarawak (Gagasan) ke baru ditumbuh, kemari. -Gambar GHAZALI BUJANG

KUCHING: Sebengkah Sempekat Pemereti Ati (MoU) penumbuh gempung politik baru udah ditanggam kemari mungkur tiga blok penyakal di Sarawak.

Entara parti tu iya nya Parti Sedar Rakyat Sarawak(Sedar), Parti Aspirasi Rakyat Sarawak (Aspirasi) enggau Parti Bansa Dayak Sarawak Baru (PBDSB).

Chairman Tetap PDBS, Dr John Brian Anthony madah, penumbuh gempung politik nya deka dikumbai Gagasan Rakyat Sarawak (Gagasan).

Ku iya, penumbuh gempung nya dikena nyeliahka tiga parti nya enda bepadan maya napi Pengawa Bepilih Besai Ke-15 (PRU-15) kelimpah negika nasip rayat Sarawak.

“Kami andalka penumbuh Gagasan tu deka meri penegap laban genap parti menua bisi pengelebih kediri empu.

“Gagasan tu mega deka numbuhka sebuah perintah altenatif ke manah agi enggau atur ke meruan,” ku iya.

Pengari Gagasan mansutka jaku nya ba Pengawa Nyain MoU Numbuhka Gagasan di Hotel Hilton, kemari.

MoU nya disain Presiden PBDS, Bobby William, Presiden Aspirasi, Lina Soo enggau Presiden Sedar, Datuk Othman Abdillah.

Nangkan nya, Othman madah, penumbuh Gagasan tu deka ngirai chalun ba semua 31 sitak parlimen di Sarawak maya PRU-15.

Ku iya, Gagasan keran ngempu semua penuduk parlimen sereta bepadan enggau Gempung Parti Sarawak (GPS) sereta Pakatan Harapan (PH) maya PRU-15.

“Baka ke nyadi lebuh Pengawa Bepilih Nengeri Ke-12 (PRN-12), kami bepadan enggau pangan diri lalu tu meri pengelebih ngagai GPS.

“Nya kebuah, Gagasan tu ditumbuh ngambi kami ulih bepadan enggau GPS.

“Kami berengkah enggau tiga parti penyakal di Sarawak dulu lalu kami ngelaluka parti bukai (blok penyakal) sama masuk Gagasan tu.

“Naka diatu, kami benung nganti pemendar numbuhka Gagasan ari Opis Pengerejister Gerempung (Ros) lalu ngarapka nya dikemendar sebedau PRU-15,” ku iya.

Suara Sarawak