Tiga pekara malin ngatur pemansang ba sitak Dun, Parlimen
MALIN PENGARI RAYAT…Speaker DUN Tan Sri Datuk Amar Mohamad Asfia Awang Nassar (tengah) nyuaka bup ‘Perangkaan Subnasional DUN Sarawak’ ngagai ADUN Opar Billy Sujang ditangkan bala YB Parlimen enggau Dun nyerumba Siri Jelajah di BCCK. -Gambar : Mohd Alif Noni

KUCHING: Tiga pekara iya nya penerang, data sereta statistik silik ari Opis Perangkaan Malaysia nya beguna amat nyadika malin pengari rayat dikena merambu pemansang sitak sida.

Speaker Dun, Tan Sri Mohamad Asfia Awang Nassar madah, penerang nya mungkur statistik ekonomi rama, peranak, rumah, pengereja pengawa, penatai pemisi tuai bilik enggau perengkaguna pemun.

“Tu mega nyadi pemutus, pengawa matau program pemansang menua sereta pansik renggat nengeri, pelilih, parlimen enggau Dun.

“Statistik tu mega ulih mantu enggau meri penerang ngagai Adun ngambi merambu strategi ke patut dikena nyamin enggau meri servis pemadu manah ba sitak sida,” ku iya.

Asfia mansutka jaku nya ba Pengawa Bejadika Pejalai Parlimen enggau Dun: Penemuan Utama Banci Malaysia 2020 sereta Pemansut Kasar Dalam Menua (KDNK) 2021, Sarawak kemari.

Nya kebuah ku iya, pengari rayat enda ibuh irau enggau statistik nambahka peranak tauka pengundi ba sitak sida tang ngena pengelebih nya menang maya pengawa bepilih ke deka datai.

“Ambika chunto, Dun Senadin bisi mayuh rumah enggau peranak pemadu tinggi di Sarawak iya nya 132,000 enggau 43, 237 unit rumah seraya Adun Tupong ba penuduk kedua pemadu tinggi iya nya 91,000 peranak enggau 27, 301 unit rumah.

“Asil banchi 2020, peranak Sarawak dirikodka 2.45 juta iku. Kitai enda ulih nyeliahka penyampau pengundi majak nambah.

“Dikena menang pengawa bepilih, penyampau pengundi ukai pekara ke beguna.

“Tu bepanggai ngagai sida ngena peluang ngambi menang. Tu nentuka penau siku-siku,” ku iya.

Naka tu, penerang ukai agi diguna ba renggat menua, nengeri tauka pelilih sereta sitak, endur baka taman tauka genturung pendiau.

Statistik ba renggat pemadu mit tu diguna nambahka infrastruktur sereta ngerintaika polisi ungkup pengelantang rayat.

Sama datai Tuai Perangkaan Malaysia Datuk Sri Dr. Mohd Uzir Mahidin.

Suara Sarawak