CHAMPION FUTSAL LELAKI…Tim N59 Tamin champion ba kategori lelaki Pekit Main Futsal GPS/PBB.

SARIKEI: Tim Starmanok FT ti ngarika N.49 Tamin udah mujur teulihka gelar champion ba Pekit Main Futsal Gempung Parti Sarawak (GPS)/ Parti Pesaka Bumiputera Bersatu (PBB) ungkup kategori lelaki.

Bekau ari pemujur nya sida pulai perais mata duit sepenyampau RM5000 disempulang enggau trofi.

Penuduk lumur dua dipenggi Matrixx United ti ngarika N.41 Kuala Rajang lalu sida iya nerima perais RM3000 enggau trofi.

Udah nya, lumur lumur tiga dipenggi dua buah tim iya nya tim N.57 Tellian enggau N61 Pelagus ke mai pulai trofi enggau mata duit RM1500.

Nangkan ke nya, ba kategori orang indu, tim Nangka United mujur ngempu gelar champion ke lalu nerima perais mata duit RM4000 enggau trofi.

Udah nya lumur dua dipenggi Fifty Eight ti ngarika N58 Balingian mai pulai perais mata duit RM2000 enggau trofi.

Penuduk lumur tiga diempu dua buah tim iya nya tim N.41 Kuala Rajang 2 enggau N44 Jemoreng ti bela nerima perais RM1000 enggau trofi.

Nangkan ke nya mega, empat buah tim ari kategori lelaki iya nya tim N38 Kalaka, Pemuda Pelawan, N Five 3 enggau N50 Machan FC bela diberi perais pengaga ati sepenyampau RM750.

Ungkup kategori indu, tim ke nerima perais pengaga ati sepenyampau RM700 iya nya Diamond FT, Puteri Pelawan, N56 Dalat FT enggau N41 Kuala Rajang Zon TM.

Kelimpah ari nya, 44 buah tim bukai ke bela ngambi bagi ba pekit tu enda pulai enggau jari puang laban sida mega bisi diungkupka perais pengaga ati sepenyampau RM300.

Anugerah Pemain Ti Pemadu Nyulut ungkup kategori lelaki dipenggi Mohd Ismail Mohammad ari Starmanok FT lalu kategori indu dipenggi Syamimi Ibrahim ari Fifty Eight ti nerima perais mata duit RM200.

Udah nya, ba Anugerah Jaga Gol Pemadu Nyulut dipenggi Mohd Rezza Basri ari Tim Matrixx United enggau Rafidah Maidi ari Tim Nangka United bela nerima perais RM200.

Semua perais ungkup bala pemenang disuaka Kaban Parlimen P.206 Tanjong Manis, Ir Yusuf Abd Wahab ba Dewan Mayuh Guna Kampung Seberang Sarikei lemai ensana.

Sama bisi datai Sekretari Politik Premier Sarawak Romeo Christopher Tegong enggau Chairman Pengatur Pekit Futsal GPS/PBB Wilayah Tengah Sarawak 2022 Datuk Mazlan Mohammad Salleh.

CHAMPION FUTSAL INDU..Tim Nangka United begambar kenang begulai enggau Kaban Parlimen Tanjong Manis, Ir Yusuf Abd Wahab sepengudah teulihka gelar champion ungkup kategori indu.

Suara Sarawak