BALA ke datai ari pupu bansa Dayak ngulu Gawai Serumpun Tampun Juah nyengkaum bala menyadi ari bansa Dayak Sisang, Dayak Bisomu, Dayak Sebaru kelimpah kitai Dayak Iban empu.

Bala mayuh datai begulu begelemu ngabas Tembawai saum, bela datai betunggah besembah ngagai Petara aki ini. Sama bela nerantangka Tabuh gendang diri empu kena bekangau betesau bekumbai.

Enggai nyadi ngalau bekangau nengah ‘tower telephone’ munyi Timang kontemporari ngambi Petara Ngabang nesau ngena ‘tawa telekom’ ngitang Panggau ngena ‘win kren’.

Nyadi menyadi kitai, Linggir Dang nerantangka tawak kena pagi Hari Enam, 13 Ogos ba pengawa Gawai Serumpun Tampun Juah dipenyadi ba Tembawai Tampun Juah, Kalimantan Barat, Indonesia.

Ku iya, tuju pengawa nerantangka tawak nya ngambi kitai bela begelumu, apin pengawa berengkah. Udah tawak diterantang, kitai lalu datai begelumu empuru, orang ka berengkah belatur deka Bedara.

Apin orang betanggungka rengka piring, dia orang nebah Gendang Rayah kena mansutka rengka ke ruai tauka ke tanju tauka palan ti deka alai miring.

Orang ti dipadu nyadi tuai Adat tauka Tuai Pengawa Miring ba Gawai Serumpun Tampun Juah sekali tu, Linggir Dang empu.

Pengatur Raban Gempung Orang Asal Sabah Sarawak (GOASS), Brunei Darul Salam enggau London ke mega Duta Tampun Juah, Themotty Jagak sama bisi enggau kin.

Tampun Juah nya menua asal kitai bansa Dayak, tembawai kepenudi kitai Dayak ti semina 4 kilometer (km) ari Kampung Mongkos, Serian, ba adan menua Sarawak enggau Kalimantan.

Tembawai tu mega dikumbai bisi kaul enggau pendiau dua raban bansa; Dayak Bidayuh enggau Dayak Iban, laban agi bisi sekeda utai ke agi nyengenda ulih dipeda baka Tiang Sandung enggau Pentik.

Kededua pesaka tuai nya suah diabas enggau dikupas bala kitai lebih agi maya nirika Gawai Serumpun Tampun Juah, nyadi nalan sida miring sereta beniat ngagai Petara.

Suara Sarawak