Datuk Willie Mongin

KUCHING: Kaban Parlimen Puncak Borneo Datuk Willie Mongin diterima tama dalam Parti  Pesaka Bumiputera Bersatu (PBB).

Pekara nya dipansutka Presiden PBB Datuk Patinggi Tan Sri Abang Johari Tun Openg.

“Aum tadi udah nerima peminta Willie nyadi kaban baru PBB enggau nadai kelikuh.

“Iya nyadi kaban aja laban iya meri sukung manah ngagai PBB,” ku iya.

Abang Johari bejaku munyi nya pengudah Aum Kaunsil Supreme PBB di Indu Opis PBB ditu, kemari.

Apin lama, Willie ti mega Sapit Menteri Pengawa Bekebun enggau Komoditi madahka iya udah nganjung peminta tama ngagai sebuah parti Gempung Parti Sarawak (GPS).

Willie ngempu penuduk Pucak Borneo rambau Pengawa Bepilih Besai (PRU-14) ngena tiket Parti Keadilan Rayat (PKR) teulihka 18,865 undi ngalahka Genot Sinel (PBB) teulihka 14,860 undi enggau Buin Patrick Ribos (Star) teulihka 795 undi.

Nangkan nya, lebuh ditanya sentang peminta Kaban Parlimen Lubok Antu Jugah Muyang ti deka tama ngagai Parti Rayat Sarawak (PRS), Abang Johari madahka pemutus nerima Jugah tauka enda bepanggai ngagai PRS empu.

“Nya awakka PRS empu, laban iya nadai ngaga peminta kitu (PBB),” ku iya.

Kena 25 June apin lama, Jugah madahka iya udah ngaga peminta deka masuk PRS.

Rambau PRU-14, Jugah ngempu penuduk Parlimen Lubok Antu pengudah teulihka 5,834 undi atas tikit ngatika diri ngalahka chalun Barisan Nasional Robert Pasang Alam teulihka 4,775 undi enggau calon PKR Nicholas Bawin Anggat (3,942 undi).

Suara Sarawak