PENGAWA NYAIN MOU…Premier Sarawak Datuk Patinggi Tan Sri Abang Johari Tun Openg (tengah) enggau Sapit Premier Datuk Amar Awang Tengah Ali Hasan (tiga kanan) sereta bala bukai ngematak pengawa nyain MoU entara JTS Sarawak diarika Direktor iya Datuk Abdullah Julaihi (duduk tengah) enggau ACLS diarika Chairman iya Datuk Sudarsono Osman (duduk kanan) enggau CENTEXS diarika Sapit Direktor Digital enggau Akedemi Dr. Dayang Hasnani Abang Ibrahim (duduk kiba). -Gambar RAMIDI SUBARI

KUCHING: Perintah Sarawak udah ngemendarka pengawa nambahka 400 jurusukat ba Opis Tanah enggau Survei (JTS) bagi nangkup peminta sereta nyikap diri nuju nengeri maju ba taun 2030.

Premier Sarawak Datuk Patinggi Tan Sri Abang Johari Tun Openg madahka, pekara nya beguna awakka pengawa nyukat tanah ulih dipejalaika enggau lengkas sereta lanchar.

“Kitai ngembuan peminta nambahka 400 jurusukat agi, laban nuju ngagai taun 2030 nya mega diguna ungkup sektor perintah enggau peribit.

“JTS ngembuan tatak sida, nya alai kitai endang deka begunaka sektor peribit dikena ngatur pengawa nyukat tanah ngujungka jurusukat sida mesti ditambah,” ku iya.

Abang Johari bejaku munyi nya rambau Program Nangguhka Hari Inovasyen enggau Integriti Tanah enggau Survei (HIITS) 2022 di sebuah hotel ditu ensana.

Iya madahka, Perintah Sarawak ngembuan sekeda polisi ti deka ngubah ekonomi menua tu ke alai semua nya mega bepanggai ngagai tanah.

Ku iya, pemansang di Sarawak mungkur pengawa berumah enggau komersial, tanah Hak Adat Bumiputera (NCR), pemansang palan betanam betupi enggau ke bukai.

“Udah tu, engka bisi perambu bukai ti begunaka pengawa nyukat tanah laban nya berubah nitih gaya menua.

“Nya alai, enti kitai meda endang raban jurusukat tu diguna laban tu pengawa profesional, kitai enda ulih sengapa nyukat tanah,” ku iya.

Sama bisi datai Sapit Premier Sarawak Datuk Amar Awang Tengah Ali Hasan, Sekretari Perintah Sarawak Datuk Seri Abu Bakar Marzuki, Sapit Menteri Integriti enggau Ombudsman Datuk Dr Juanda Jaya, Direktor JTS Abdullah Julaihi enggau bala bukai.

Suara Sarawak