SINU…Agung (kiba) enggau apai iya, berasai sinu nngenang pemidang niang menyadi iya Adrian ti enda sempat enggau graduasyen Swinburne University of Technology Sarawak ba BCCK ditu ensana.

KUCHING: Lebuh meda nembiak bukai gaga ngintu hari ti chukup besai reti laban udah mujur nerima topi segi empat beserimbai pengerami graduasyen Swinburne University of Technology Sarawak apin lama, siku apai semina labuh ai mata beratika anak iya enda sempat niki panggau nerima skrol degree diri laban udah midang pun taun tu tadi.

Niang Adrian Prakasa, 22 siku nembiak ke ngambi bidang Degree Injinir (Robot enggau Mechatronics) siku nembiak entarabansa asal Jakarta, Indonesia ti besekula ba Kampus Swinburne Sarawak sebedau tu midang kena bulan Januari 2022.

Agung Saputra, 34, ti ngarika niang menyadi iya madahka diri berasai temegah laban menyadi iya udah mujur nembuka degree nya.

“Aku berasai temegah iya mujur nembuka pelajar tu, semina aku enggau apai aja datai kitu ngintu pemujur iya,” ku iya lebuh ditanya pemberita ba Palan Aum Borneo Kuching (BCCK) ditu ensana.

Taja pia, Agung enggai nyaut tanya bala pemberita pasal kebuah niang Adrian midang.

“Minta ampun, aku enda ulih bejaku mayuh pasal iya. Kami duai semina dua iku diri menyadi aja, lalu diatu tinggal aku kediri,” ku iya.

Lebuh bala pemberita ngambi gambar seduai menyanak, apai niang Adrian enda ulih ngetatka ai mata sinu labuh seraya nyandarka pala iya ngagai Agung.

Agung nangkan nya, lalu merap apai iya seraya meri terima kasih ngagai pemberita lalu mupuk mai apai iya ke palan bukai.

Suara Sarawak