Home RUAI Anang betangguh mutar isu bekal ai di Sibu Jaya

Anang betangguh mutar isu bekal ai di Sibu Jaya

PUTAR LENGKAS… Tiong berandau enggau bala pegawai ke bisi datai ba aum nya.

SIBU: Ejensi bekaul dipinta mutarka penanggul bekal ai tejanggal ditapi peranak Sibu Jaya enggau lengkas.

Adun Dudong Datuk Seri Tiong King Sing madah, isu nya udah kelalu lama nating peranak ditu.

Tiong madah nyemetak, udah nyadi tanggungpengawa ejensi nya mai peranak pansut ari penanggul ke lama udah nyadi lalu mutar enggau lengkas.

“Isu bekal ai tejanggal di Sibu Jaya majak meri penanggul ngagai peranak dia.

“Enti nitih, haribulan kepenudi mutarka penanggul nya ujung bulan Julai tu tadi.

“Peranak ditu agi ngasaika pemerinsa ketegal suntuk bekal ai ngujungka mayuh sebana ke pekara tu,” ku Kaban Parlimen Bintulu nya.

Berindik ari nya kena Hari Empat tu tadi, Tiong udah mantaika pekara nya ba Aum Komiti Ngaduka Pemansang Nengeri ti diatur Unit Matau Opis Premier Sarawak ngambi diberi penerang.

Ku iya, ba aum nya madahka Opis Bekal Ai Menua Pesisir Sarawak (JBALB) enda ulih nyendiaka bekal ai dalam servis ba timpuh ke ditetapka sebedau tu laban penanggul teknikal.

Nya kebuah, Presiden Parti Progresif Demokratik (PDP) madah nyemetak, peranak Sibu Jaya nyentuk diatu agi napi penanggul ketegal suntuk bekal ai ke majak nyadi.

“JBALB mega meri jamin ba aum nya, penanggul teknikal benung diputar lalu disadang ulih diputar ujung bulan tu.

“Taja bekal ai di Sibu Jaya enggau Eco Garden disadang manah baru ujung bulan tu, sejarah ke udah nyadi nunjukka JBALB enggau Kaunsil Ai Sibu enda nyemetak nerang ngagai mensia mayuh pasal kebuah sida enda ulih mutarka pekara nya nitihka taga,” ku iya.

Tiong mega madah, taja mayuh ripot diberi sida sebedau tu, mensia mayuh agi nganti bekal ai ke nadai penanggul pengelama beberapa bulan enggau betaun lalu sida mega ringat enggau penanggul ke majak nyadi tu.

“Ejensi perintah tu agi ngasaika duit pemayar chukai lalu enda sedarka sida patut berundingka peminta rayat enggau manah agi.

“Sebarang perambu bekaul enggau pengelantang rayat mesti dibasa laban sida bisi hak nemu pasal pekara nya.

“Taja sebarang projek ditangguh ketegal bisi kebuah, sida mesti madah enggau nyemetak sereta anang ngelalai ari mensia mayuh,” ku iya.

Tiong ke mega Duta Khas Menteri Besai Ke Republik Rakyat China madah, ulah baka tu tau ngasuh mensia mayuh ngembuan peragam negatif ngagai ejensi ti beempu tanggung pengawa tu.

Iya mega madah, pekara tu deka ngasuh peranak mantaika sebana enggau chara kasar ketegal balat ringat ngambi sada sida didinga.

“Aku minta semua ejensi bekaul berumban mutarka penanggul bekal ai di Sibu Jaya,” ku Tiong.

Kena Hari Tiga tu tadi, peranak rumah flat Sibu Jaya mantaika sebana sida ngagai raban nya ngambi mutarka penanggul suntuk bekal ai ba rumah sida nyengkaum di Sibu Jaya kenyau ari 13 taun ke udah.

Pengawa mantaika sebana nya betuaika Chairman Serakup Nasional Dayak Sarawak (SDNU) Sibu Jaya Danggang Ugik.

Ku iya, nadai utai deka dikejaku agi kelimpah ngansah raban nya berumban mutarka penanggul bekal ai di Sibu Jaya.

“Nadai utai deka dipadah agi laban penanggul nya udah kelalu lama tang nadai inisiatif timpuh panjai. Kami merinsa, berapa lama agi deka nganti,” ku Danggang.

Nitihka penerang, penanggul suntuk bekal ai tu suah nyadi maya pagi enggau malam nyentuk nadai ai ba sekeda endur.

Suara Sarawak