KUCHING: Chairman Parti Tindakan Demokratik (DAP) Sarawak Chong Chieng Jen ngansak anugerah pangkat Darjah Utama Yang Amat Mulia Bintang Kenyalang ba Datuk Seri Najib Abdul Razak dibatak pulai.

Pengawa meri pangkat lumur dua pemadu tinggi Sarawak ke mai gelar Datuk Patinggi nya diterima iya ba taun 2009.

Kenu ku Chong, Perintah Sarawak patut ngelalau Tuai Pemegai Menua (TYT) Sarawak nginsil anugerah nya laban ex- Menteri nya diatu benung dijil.

“Nengah gerah ari Kort Perintah Besai, enda ulih dikeengai Najib diatu ‘orang salah’ laban ngereja penyalah salah guna kuasa, enda lurus enggau nuchi duit enda sah.

“Pia mega udah disebut ba mua akim Kort Apil iya udah ‘ngemaluka menua’.

CHAIRMAN DAP SARAWAK…CHONG CHIENG JEN

“Nya alai, enda patut majak ngemendarka iya ngena pangkat besai nengeri Sarawak nya ti mai gelar “Datuk Patinggi”k,” ku iya madah nengah sebengkah penerang, kemari.

Tandu iya, pengawa ke sebaka udah digaga Selangor enggau Pulau Pinang ti matak pulai pengawa meri pangkat ngagai Najib.

“Nya alai, aku minta perintah ngelalau TYT Sarawak nginsil anugerah nya ungkup Najib,” ku iya.

Pangkat lumur dua pemadu besai nangkan Satria Bintang Sarawak ti mai gelar Pehin Sri nya diberi ngagai orang ke ngembuan pangkat besai enggau udah mayuh nyaup ngemansangka nengeri ungkup timpuh ke lama.

Dulu ari nya, kena Hari Empat Tuai Pemegai Menua (TYT) Pulau Pinang Tun Ahmad Fuzi Abdul Razak setuju matak pulai anugerah Darjah Utama Pangkuan Negeri (D.U.P.N.) ke mai gelar Datuk Seri Utama ungkup Najib taun 2009 dikinsil tekala nya.

Pengawa nginsil pangkat nya dikemendarka TYT Pulau Pinang nitihka Perkara 6 enggau 8 Perlembagaan Negeri Pulau Pinang sereta Peraturan 18 Statut Darjah Pangkuan Negeri 2011.

Berebak enggau nya, kena Hari Satu minggu ke udah, Sultan Selangor Sultan Sharafuddin Idris Shah ngasuh pangkat besai ke mai gelar ‘Datuk Seri’ enggau ‘Datuk’ ungkup Najib taun 2004 enggau 1992, dibatak pulai enggau dikinsil.

Ungkup penemu kena 23 Ogos , Kort Perintah Besai nejuka ukum 12 taun jil enggau ukum mata duit RM210 juta ngagai Najib ketegal enda lurus, salah guna kuasa, enggau nuchi duit enda sah belanja RM42 juta dipenggi SRC International Sdn Bhd (SRC).

Nya mega siti sejarah baru ngagai menua tu laban keterubah iya ex-menteri besai dijil. Najib diatu benung dijil ba Rumah Jil Kajang.

Suara Sarawak