UNGKUP ALBUM…Abang Johari (tiga kiba) begambar enggau Awang (dua kiba) rambau bejadika Program Investsmart@Borneo ti diatur SCM ba sebuah palan bebeli barang ditu, kemari.

KUCHING: Rayat di menua tu dipinta seruran bejimat enggau ulah raban scammer tauka penipu ti suah ‘nginti’ orang ngena chara ngumpan meranakka puku ba media rama.

Premier Sarawak Datuk Patinggi Tan Sri Abang Johari Tun Openg ngelalu rayat anang mudah pechayaka semaya scammer ti kekadang madahka ulih meranakka puku manggai 25 peratus.

“Nyema pemulai untung ngelui ari puku, udah tentu bisi utai enda betul.

“Nya alai, kitai patut nanya Bank Negara tauka ‘Suruhanjaya Sekuriti Malaysia’ (SCM) nentuka pekara nya, laban enggaika pengujung ila semua nya ketegal scammer, ku jaku deka bulih duit tang nuan lenyau duit,” ku iya.

Abang Johari bejaku munyi nya rambau bejadika Program Investsmart@Borneo ti diatur SCM ba sebuah palan bebeli barang ditu, kemari.

Ku iya, pekara baka nya deka meri penanggul ngagai orang ti ditipu nyengkaum ruang bilik sida empu.

“Ila bini nanya, ni duit nya, nama kebuah baka tu?, ngujungka nyadi penanggul penyarut ba ruang bilik.

“Nya alai, aku ngelalu ke penatai raban SCM meri penerang enggau penemu pasal baka ni kitai deka meranakka puku enggau likun.

“Tadi aku bisi meda jaku ‘Silap Melabur, Duit Melebur’, nya ngelaika enti salah duit kitai abis,” ku iya.

Iya nangkan nya, andalka rayat seruran sedar sereta bejimat kelebih agi nengah media rama laban nadai interaksyen batang tubuh entara pemeranak puku enggau orang ti bejalaika pengawa nya.

Sama bisi datai Sapit Premier Sarawak Datuk Seri Prof Sim Kui Hian, Chairman SCM Datuk Seri Dr Awang Adek Hussin enggau bala bukai.

Suara Sarawak