ARAM SAMPAL DATAI…Harden (tengah) begulai enggau bala komiti PBSA2022 mandangka brosur PBSA2022.

SIMANGGANG: Bisi 17 bengkah program udah dirintai deka diatur nyerumba Pengerami Benak Sri Aman 2022 (PBSA2022) kena 9 nyentuk 11 September tu.

Chairman Komiti PBSA2022, Elvis Didit madah, program pemun maya nya ila nyengkaum Regata Benak (lumba perau), Pekit Kumang Dagang Temuai Benak enggau Mr Benak.

Ku iya, ukai naka nya aja, pekit Ratu Kebaya Nyonya Kontemporari, Benak Idol, Bazaar Ria, Kayuhan Benak sereta Pekit Seni Sada enggau Gaya Burung.

Pia mega, pekit fotografi, Panggau Main Asal, Konsert Belagu sereta Eksibisyen Pemansang mega deka diatur maya nya ila.

“Maya nya ila, sepenyampau 450 palan endur bedaja megabisi dibuka kena ngerichahka agi Pengerami Benak.

“Kebendar iya pengerami tu udah berengkah diatur kena ke 28 Ogos tu tadi nengah sebengkah program ngangatka isi iya nya Benak Road Trail Run ke dipasuk 1250 iku bala penyereta.

“Nya alai, aku ngarapka sepenyampau 50,000 iku bala temuai datai ngerichuhka agi pengerami tu ila kelebih agi lebuh pintu entara menua Malaysia-Kalimantan Barat, Indonesia udah dibuka sebedau tu,” ku padah Elvis.

Elvis mansutka penemu nya lebuh bejaku ba aum media ba Aum PBSA2022 ke diatur ba Bilik Aum Ejensi Pemansang Sri Aman (Sada) ensana.

Dulu agi ari nya, aum nya betuaika Sapit Menteri Pelajar, Inovasyen enggau Pemansang Penau (Meitd) ke mega Kaban Kaunsil Negeri (Adun) Simanggang, Datuk Francis Harden Hollis.

Ba aum nya, Harden bela nyuaka chek ngagai ejensi perintah lalu siti ari chek nya ungkup Komiti Pengerami Benak Sri Aman 2022 ke sepenyampau RM50,000.

Sama ngulu aum tu nyengkaum Residen Pelilih Sri Aman, Sirai Daha, Penerit Adat Opis Tanah enggau Survei Sri Aman, Michaelson Nyisin, Sekretari Kaunsil Pelilih Sri Aman, Tay Guan Huat enggau bala pengari ari ejensi perintah ditu.

Suara Sarawak