Buding baru deka digaga ba YSIS
JAGA PENGELANTANG NEMBIAK… Abang Johari benung mendingka penerang ari Prinsipal YSIS Bahtiar Afandi (kanan) maya datai ba sekula nya kemari. -Gambar RAMIDI SUBARI

KUCHING: Sekula Entarabansa Yayasan Sarawak (YSIS) di Petra Jaya, Kuching deka bisi sebuah blok buding baru dikena nambahka buding nembiak sekula nya.

Premier Sarawak, Datuk Patinggi Tan Sri Abang Johari Tun Openg madahka pekara nya bekau ari buding kediatu enda chukup nangkup pemayuh nembiak.

“Aku meda urung 70 ke 80 palan nembiak disediaka buding ditu ke alai nembiak bukai berundang ari rumah laban buding enda chukup.

“Bekau ari nya sebuah blok buding baru deka digaga ba YSIS seriris pengawa Sarawak ngaga mayuh agi sekula ti bisi buding ungkup nembiak di menua tu,” ku iya.

Abang Johari bejaku munyi nya rambau ngulu Fun Ride Begulai Premier Sarawak di YSIS Petra Jaya ditu kemari.

Ngelansa dalam agi, Abang Johari madahka pekara nya mega deka mantu apai indai ti enda ulih suah nganjung bala anak sekula ba sekula entarabansa.

Ku iya, bala nembiak ti sekula ba palan nya ngembuan sekeda syarat laban sekula nya ngembuan standard bagi nyendiaka pelajar bekualiti.

Iya andalka, nembiak ti udah pandai besekula ba universiti pemadu manah ila deka pulai lalu mantu perintah ngubah ekonomi menua.

“Nya kebuah aku ngaku jaku English nyadi jaku entarabansa ke alai enti nembiak patut ngembuan penemu jeman diatu sida mesti nemu jaku English,” ku iya.

Dulu ari nya, Abang Johari nitihka program ngena ensikal ari rumah iya lalu disempulang 100 iku ke bukai nuju YSIS.

Penatai Abang Johari dikelaluka Prinsipal YSIS Bahtiar Afandi enggau bala bukai.

Suara Sarawak