DISIPILIN BEGUNA…Abang Johari (duduk tengah) begambar kenang enggau bala nembiak YSIS Petra Jaya pengudah tembu Program Fun Ride enggau Premier Satawak kemari. Bela bisi dipeda Sapit Premier Sarawak Datuk Seri Prof Sim Kui Hian, Sekretari Perintah Sarawak Datu Sri Mohamad Abu Bakar Marzuki enggau bala bukai. -Gambar RAMIDI SUBARI

KUCHING: Nembiak ti pansut ari Sekula Entarabansa Yayasan Sarawak (YSIS) dikeandal nyadi nembiak ti pintar, meruan enggau bedisiplin.

Premier Sarawak Datuk Patinggi Tan Sri Abang Johari Tun Openg madahka rayat Sarawak ti sekula ba palan nya mesti ngembuan disiplin ti tegap.

“Nya alai, ngagai apai indai, kekadang kitai asai enggai jauh ari anak, tang kitai deka bala anak tu ngatika diri ngambi sida bisi ngembuan disiplin.

“Lebuh sida ngembuan runding ti pintar, sida deka berunding ngena chara nya, nengah pelasar enggau falsafah ti ngasuh sida berunding nama pekara ti meri pemaik ngagai menua,” ku iya.

Abang Johari bejaku munyi nya rambau ngulu Fun Ride Begulai Premier Sarawak di YSIS Petra Jaya ditu kemari.

Ku iya, kenyau lima taun ti udah lalu perintah udah berunding atur pemadu manah ti patut diberi ngagai rayat Sarawak dalam napi pemar mansang ke mua.

“Diatu dunya napi pemar kritikal ngagai ubah gaya menua, tegal nya gaya ekonomi kitai pan berubah.

“Chara pengidup kitai berubah, nya alai kitai mesti nyaga rampa menua kediatu ungkup rebak baru ba jeman ti deka datai.

“Sekeda madah bah nyadi laban dunya majak angat, sekeda madah ketegal batu ais lela ngasuh tikas ai tasik niki, sekeda madah dunya ke mua ila deka majak mit, bisi orang madah dunya deka ‘kiamat’.

“Nama pengawa kitai diatu? Semua nya pulai ngagai reti sainstifik,” ku iya.

Iya nangkan nya madahka, nya kebuah Sarawak dibaruh pegai iya meri perati ti besai ngagai pekara pelajar.

“Ari sekula sekondari, kitai biai aset universiti baka Universiti Curtin, Swinburne, Universiti Teknologi Sibu, ICATS ti udah nyadi universiti kolej enggau Palan Penyulut Teknikal Sarawak (Centexs) ungkup nembiak tembu sekula.

“Kitai deka ngembuan institusyen pelajar tinggi seikas menua luar, nya alai dalam ngubah teknologi enggau penemu tu, kitai begunaka jaku English.

“Kitai deka meruan nampung pengawa tu dalam ngubah Sarawak baka menua Korea ti udah nyadi menua maju ba jeman ti deka datai,” ku iya.

Sama bisi datai Sapit Premier Sarawak Datuk Seri Prof Sim Kui Hian, Sekretari Perintah Sarawak Datu Sri Mohamad Abu Bakar Marzuki enggau bala bukai.

Suara Sarawak