KUCHING: Inisiatif raban bansa Iban ngerikod, nyimpan enggau ngaga dokumentasyen Pengerami Gawai Antu chara digital mesti ditunda etnik bukai ba Sarawak.

Premier Sarawak Datuk Patinggi Tan Sri Abang Johari Tun Openg madah, pekara tu beguna amat dikena ngetanka pesaka asal sida ungkup dipeda rebak dudi.

NYAGA PESAKA ASAL… Abang Johari nerima tepa ari Alfred Jabu pengudah Pengawa Ngelancharka Dokumentari Gawai Antu Rumah Panjai Gensurai Layar Betong di Muzium Budaya Borneo, di Kuching tadi.

“Inisiatif besai ngerikod enggau nyimpan adat asal chara digital tu nentuka pekara nya ulih diambi baru ngambi dipeda mensia mayuh tauka ungkup tuju bukai dudi hari,” ku iya.

Abang Johari mansutka jaku nya ba Pengawa Ngelancharka Dokumentasyen Gawai Antu Rumah Panjai Gensurai Layar Betong di Muzium Budaya Borneo ditu tadi.

Ku iya, dokumentasyen nya penemu sida ex-Sapit Kepala Menteri, Datuk Patinggi Tan Sri Alfred Jabu Numpang sebilik ngambi ulih dijaga sereta ulih dipeda rebak biak enggau orang luar.

Suara Sarawak