KUCHING: Kerejasama tegap sereta pemanah kaul entara Malaysia enggau China ngujungka Sarawak ulih bekunsi pengelantang ekonomi, ku Premier Sarawak Datuk Patinggi Tan Sri Abang Johari Tun Openg.

Kenu ku iya, China entara bakih dagang besai Sarawak taun 2021 iya nya ngerikod RM27.05 bilion, ngarika urung 17.93 peratus ari penyampau dagang di nengeri tu.

“Pengawa dagang nengeri tu enggau China endang lumur dua pemadu tinggi nangkan Semenanjung Malaysia ke ngerikod RM150.9 bilion tauka 25.3 peratus.

KAUL DAGANG…Dr Sim (lima kiba) enggau Konsul Jeneral Republik Rakyat China Xing Weiping begambar kenang ba pengawa Ngintu Taun Ke-73 Penumbuh China di Kuching, malam ensana.

“Kelimpah ari nya, eksport Sarawak ke China beungkus RM18.63 bilion mungkur produk baka petroleum, minyak sawit, produk kayu sereta komponen karan, lalu import sepenyampau RM8.4 bilion,” ku iya.

Iya madah munyi nya nengah teks jaku iaku dibacha Sapit Premier Sarawak Datuk Seri Dri Sim Kui Hian nyerumba Pengerami Ngintu Taun Ke-73 Penumbuh China , malam ensana.

Nerang silik, ku iya kaul dagang Sarawak enggau China mega majak nambah. Ba taun 2020, asil dagang dirikodka RM20.5 bilion, dibanding RM27.05 bilion ba taun 2021 ungkup eksport ngerikod RM13.8 bilion enggau import RM6.7 bilion.

“Nya alai, siti ari jalai mansang ungkup nengeri tu iya nya meda makit ke lebih besai di menua bukai baka China. Nengah populasi rayat lebih 1 bilion, udah tentu nya endang makit besai ungkup produk ari Sarawak.

“Dikearapka pengelebih nya dikena manah nengah pengawa nyual produk nengeri tu lebih agi pemakai, dikena ngamatka juluk kami nyadi pengeksport pemakai beresi manggai taun 2030,” ku iya.

Iya mega madah nengah kerejasama ekonomi entara China enggau Sarawak ke majak ba pelasar ke betul laban bisi sukung enggau pemeranak puku ari menua nya lebih agi ba sektor infrastruktur enggau pengawa kunteriktor, ngaga barang enggau betanam betupi.

“Berebak enggau nya, ba pengawa nuju digital mega, nengah CENTEXS enggau nyediaka servis ke mega nengah Huawei, nya muka jalai endur numbuhka Mengeri Pintar 5G enggau disukung nengah program latih tambah.

“Inisiatif tu ngelai atur progresif Sarawak ngelaku enggau nyeririska pansik ngagai pengawa ngunaan teknologi 5G ulih dikeamat nengah bantu China,” ku iua.

Berebak enggau nya, ku tiga unit keterubah bas hidrogen sereta Transit Jalai Autonomi (ART) mega asil pemanah kaul enggau menua nya ngarika pengeransing nengeri tu ngena kuasa gadung.

“Sarawak deka terus milih China nyadi bakih dagang sereta ngarap mayuh agi pengawa betukar penemu enggau menua nya. Kitai seruran ngelaluka mayuh orang ari menua nya raun ngagai nengeri tu.

“Sarawak mega betuah laban ngembuan siku rayat ke dipadu nyadi Duta Khas Menteri Besai ke China, iya nya Kaban Parlimen Bintulu, Datuk Seri Tiong King Sing.

“Nya alai, ngarapka kitai deka terus ngasaika pemaik ari pangku pengawa dipegai Tiong nya dikena nambahka agi pemanaj kaul dagang entara China enggau Malaysia, lebih agi Sarawak,” ku iya.

Suara Sarawak