DATUK PATINGGI TAN SRI ABANG JOHARI

KUCHING: Peminta Sarawak enggau Sabah ngagai agih penuduk Parlimen 35 peratus nya semina ngemetulka pekara ti enda sebela.

Premier Sarawak Datuk Patinggi Tan Sri Abang Johari Tun Openg madahka pekara tu ketegal Konstitusyen ulih diubah nengah dua pertiga sukung.

“Aku nganti Perintah Besai, dibaruh Sempekat Malaysia 1963 (MA63), kitai udah besetuju ‘in prinsiple’ ti madahka Sarawak enggau Sabah mesti bulih 35 peratus pengari ba renggat Parlimen.

“Tu sebagi ari pekara dalam Ripot Komiti Entara Perintah (IGC), udah Singapore pansut ari Malaysia kitai nadai bulih agi, nya alai, pekara tu semina ngemetulka pekara ti enda sebela,” ku iya.

Abang Johari bejaku munyi nya rambau aum pemberita pengudah bejadika Program Investsmart@Borneo ti diatur SCM ba sebuah palan bebeli barang ditu, kemari.

Ku iya, enti Sabah enggau Sarawak nadai bulih 35 peratus penuduk dalam Parlimen nya, pekara tu mai reti dua pertiga majoriti nya ulih ngubah semua Konstitusyen (nyema Perintah Besai deka ngubah).

“Nya alai, kitai semina deka ngulihka pengelikun dibaruh IGC.

“Dalam IGC madahka ‘right of interest Sabah, Sarawak and Singapore must be protected’,” ku iya.

Nangkan nya, lebuh ditanya baikka bungkur pengelikun IGC tu semina ungkup tujuh taun aja, Abang Johari madahka pekara nya enda betul.

“Enda betul, laban IGC nya bisi dia sereta nyemetak bendar, nadai lumur dalam nya.

“Tang jamin dalam nya (IGC) pasal pengari Parlimen, pekara pelajar enggau jaku, aku nemu laban aku macha nya,” ku iya.

Apin lama kena 8 September, Menteri ba Opis Menteri Besai (Pekara Sabah enggau Sarawak) Datuk Seri Dr Maximus Ongkili madahka, Kaunsil Khas MA63 bisi berandauka tuntut mulaika 35 peratus penuduk Parlimen Sabah enggau Sarawak ti betuaika Menteri Besai Datuk Seri Ismail Sabri Yaakob.

Pekara tu nerima mayuh timbal ari rayat di Malaysia, ke alai sekeda ngumbai peminta nya kelalu besai laban pengundi Sabah enggau Sarawak semina meri satu per enam ari penyampau pengundi di Malaysia.

Suara Sarawak