DATAI MIH KITU…Entara bala temuai enggau bejadika Paku Rock Maze Garden di Bau kemari.

BAU: Paku Rock Maze Garden engkeman nyadi sebuah palan produk eko-dagang temuai rayat di mengeri ngasaika peneleba bejalai di kampung puang.

Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah madahka taja pan mayuh rayat di menua tu udah diau ba Sarawak, tang agi mayuh palan dagang temuai ti bedau kala digusung sida.

“Aku empu udah lama diau ba Kuching, tang tu meh keterubah iya aku datai kitu meda palan tu.

“Tu produk dagang temuai ti baru, nya alai kitai begunaka mayuh agi bala temuai datai sereta ngelawa palan tu,” ku iya.

Karim bejaku munyi nya rambau bejadika Paku Rock Maze Garden di Paku Rock Maze Garden ditu, kemari.

Ku iya, pemansang palan nya ulih dikemanahka baka palan besejarah Siniawan.

“Lebuh Kuching mansang, kitai kiruh ngemansangka jalai raya, mensia mayuh nyau enda ingatka sekeda palan lama.

“Tang bekau dua taun kitai napi pengerekai penyakit Covid-19, sekeda peranak asal pulai ke menua lalu bulih buah runding ngemansangka sekeda palan lama ti ulih nyadi produk dagang temuai.

“Nya alai, sida ngubah palan tu ngagai palan makai, palan ngayanka main asal enggau ke bukai baka ‘Night Market Siniawan’,” ku iya.

Iya nangkan nya, andalka Paku Rock Maze Garden ulih nyadi baka Siniawan lebuh semua perengkaguna ba palan nya ila dikemanah.

“Bau tebilang nama nyadi palan endur orang ngiga emas, diatu eko-dagang temuai tu meh nyadi emas ngagai kitai.

“Agi mayuh palan dagang temuai bukai ti manah ti bisi di Bau baka Tasik Biru, batu kapur enggau palan bukai,” ku iya.

Ku Karim, menua Bau ti semak ari mengeri mega ngasuh palan nya ditapatka bala temuai laban semina urung 30 ke 40 minit pejalai ari Kuching.

“Tebal agi peranak ti diau ditu bansa Bidayuh, sida endang tebilang enggau ulah ti kemerah.

“Ulah sida nya ngasuh bala temuai ti datai asai dikelaluka lalu ngasuh kitai majak deka datai kitu baru,” ku iya.

Sama bisi datai Adun Tasik Biru Datuk Henry Harry Jinep enggau Adun Serembu Miro Simuh.

Suara Sarawak