Gira (tiga ari kanan) nerima tepa sepengudah nutup Program Eksibisyen Pelajar DTTAS 2022 ti diatur ba Balai Komuniti di Sibu Jaya lemai ensanus.

SIBU: Pekara pelajar endang nyadika reta ti pemadu beguna lalu ulih dikena ngubah tikas pengidup diri empu enggau diri sebilik.

Nya alai, ku iya rayat di menua pesisir mesti sedar lalu patut ngemeratka pekara pelajar anak sida iya ambika ulih nyamin pengidup ke menyana dudi hari ila.

Kaban Kunsil Nengeri (Adun) Tamin, Ir Christopher Gira Sambang madahka, sukung ari semua raban kelebih agi apai indai endang chukup beguna dalam meri peransang ngagai bala anak sida iya ba pelajar.

Laban penemu baka kediatu endang nyadika teknologi ungkup jeman ila, ku Gira nguna leka jaku Edward Teller iya nya siku pakar Fizik ti tebilang.

Adun Tamin nya mansutka penemu tu lebuh diberi basa nutup Program Eksibisyen Pelajar DTTAS 2022 ti diatur ba Balai Komuniti di Sibu Jaya lemai ensanus.

Program sepengelama dua hari tu diatur Serakup Pemikir Dayak Sarawak (DTTAS) begulai enggau raban Masterpiece sereta nengah kerejasama Palan Servis Adun Tamin.

“Program ti udah diatur tu endang dikena ngenataika penerang bekaul peluang ba pekara pelajar, latih enggau bantu ngagai semua raban nembiak kelebih agi sida ke baru udah bulih pemutus peresa SPM enggau STPM.

“Nya alai ari program tu, nembiak ti enda mujur ba pelajar agi bisi peluang milih kus tauka bidang pelajar ke bukai ti senipak enggau pemutus peresa sereta minat sida iya,” ku Gira.

Iya mega muji juluk ati generasyen nembiak rebak baru di menua pesisir ti inginka penyulut ba pelajar endang juluk ati ti chukup berani.

Tang ku iya, juluk ati ke berani bakatu deka ngubah menua pesisir ti agi seranta nyadi sebengkah menua ke mansang dudi hari ila.

“Aku mega deka begulai enggau kita bekunsika juluk ati tu ambika kitai sama besaup ngemeratka pekara pelajar ti ulih nempa generasyen ke maju dudi hari ila,” ku tandu Gira.

Suara Sarawak