SAMPAL DATAI… Henry (tengah), Adun Batu Kitang Lo Khere Chiang (dua kiba) mantaika brochure pengudah nyain MoU enggau institusyen bekaul.

BAU: Pengerami Tasik Biru Bau 2022 diatur baru kena 22 September nyentuk 2 Oktober tu pengudah dua taun ditangguh ketegal pandemik Covid-19.

Sapit Menteri Perengka Pengangkut (Sungai enggau Tasik), Datuk Henry Harry Jinep madah, pengerami nya deka nyadi aktiviti dagang temuai Pelilih Bau ba taun-taun ti deka datai.

“Pengerami tu deka diatur belama enti sema nadai penanggul baka pandemik tauka pekara bukai.

“Pengerami tu dipeda mayuh pemaik nipakka visyen Opis Menteri Dagang Temuai, Seni enggau Main Asal Malaysia, Destinasi Lestari Kaya Budaya sereta Opis Menteri Dagang Temuai, Industri Kreatif enggau Seni Pemerindang Sarawak- Ngelakuka Dagang Temuai, Seni enggau Budaya Sarawak,” ku iya.

Henry mansutka jaku nya ba aum pemberita Pengerami Tasik Biru di Tasik Biru Food Village, kemari.

Ku iya, konsep pengerami sekali tu diubah enggau konsep dagang temuai nyadi pemansut ekonomi baru Bau.

Ku iya, bisi enam kluster ke deka dipandang ba Pengerami Tasik Biru sereta matak minat mensia mayuh.

“Entara kluster ke deka nyadi pematak nyengkaum Kluster Budaya Komuniti, Seni Pemerindang, Produk Dagang Temuai, Dapur Bau, Pengerami enggau Servis Ungkup Rayat.

“Ba kluster ti dipadah, pengusung ulih nyereta aktiviti baka Jong Regata, Miss Tasik Biru, Bazar Pemakai, Bau Bike Gathering, chabut tikit benasip enggau ke bukai,” ku iya.

Nambahka nya, Komiti Pengatur mega udah berandau enggau pengatur ungkup aktiviti di baruh Pengerami Tasik Biru.

“Sida setuju bekerejasama ngatur aktiviti dagang temuai tu pengelama tiga taun berengkah ari taun tu nyentuk 2024.

“Randau tu nentuka kerejasama ulih ditanggam ba pengerami dudi hari,” ku Henry.

Nya kebuah, sekeda institusyen udah nyain Sempekat Pemereti Ati (MoU) ditu nentuka kerejasama ngatur Pengerami Tasik Biru Bau ulih ditampung.

Ngelansa silik, pengerami ti diatur pengelama 11 hari nya disadang nerima penatai lebih 60,000 iku pengusung.

“Penatai pengusung ba pengerami tu ulih nyungkak ekonomi rama komuniti ditu.

“Mayuh orang deka bulih pemaik ari pengawa ngatur pengerami tu,” ku iya.

Suara Sarawak