NYADI PERANSANG… Jackson begambar enggau Jurulatih Joseph Harry enggau Jaguh Tinju Menua, Sapok Biki.

SARATOK: Ngembuan ulah ti ringkar enggau jampat angat ngujungka iya suah berekak ba sekula, atlit tinju Sarawak, Jackson Chambai Ikeh, ngeransing diri ba main tinju,

Bujang asal Wong Besi, Saratok bejuluk Flash Boy nya berengkah enggau orang main tinju kenyau ari semilan taun ke udah, lebuh umur manggai 12 taun.

“Laban sigi orang ke ringkar, dia aku jampat bendar angat lalu deka bendar berekak kelebih agi ba sekula lebuh nya. Nadai tau salah mimit orang ba mata aku.

“Pemuas diajar enggau beratika ulah diri, dia aku terunding enggau orang main tinju. Pengering berekak ba luar nadai guna, manah agi dianjung ba main baka tu.

“Ari nya tadi, aku ngepunka singkang diri ba main tinju begulai enggau jurulatih keterubah aku, Joseph Harry lalu iya mih orang ti mayuh ngembing enggau ngajar aku ba main tu,” terang iya.

Ba hari kepenudi pekit main tinju Lumba Malaysia (Sukma) Ke-20, nembiak beumur 21 taun nya menang midul emas ba kategori 48-51 kilogram (kg).

Jackson madah, idola tauka orang nyadi peransang iya ba main tinju kelimpah ari jurulatih iya, siku peninju ari Kazakhstan, Genandy Golovkin.

Ku iya, pemintar enggau penyikar Genandy lebuh betinju ti fokus ngagai strategi nyerang baru orang ti dilaban betinju udah narit ati iya.

“Nunda Genandy mega, aku meri perati ngagai strategi nyerang baru enggau malas tumbuk orang ti dilaban. Ati enggau mata mesti ka tajam.

“Aku tepantup ati ba renggat keterubah lebuh betinju, tang bisi asa mimit ba renggat kedua laban orang ti dilaban ka bendar merekuh ngujungka aku nadai jalai numbuk iya,” ku iya.

Jackson mataika pengering enggau pengelanchat iya betinju lalu mujur ngalahka peninju ari Wilayah Persekutuan, Mohamad Hakimi Sumadi, enggau pemutus 5-0.

Penyulut igat Jackson ba main tinju rambau Sukma sekali tu mega nerima puji ari Kaban Parlimen Saratok, Datuk Ali Biju, ti madahka diri temegah ba pesan nengah Facebook Rasmi iya kemari.

Ba lansa sama, lumur tiga dipenggi Muhammad Aidil Ashraf Abdul Razak ari Johor enggau Muhammad Mukhriz Khan Muzafar Khan ti ngarika Pulau Pinang.

Kelimpah ari Jackson, tim Tinju Kontinjen Sarawak mega champion ba kategori Feather 54-57kg nengah jaguh tinju Daeloniel Mcdelon Bong.

Daeloniel ti tampak agi dikangau Kilat Boy menang mudah ngelaban peninju Wilayah Persekutuan, Alif Akmal Muhamad Asri, enggau pemutus 5-0 mega.

Midul engkeraju diempu Sheikh Rahmatullah Ibrahim ari Pulau Pinang enggau atlit Sabah, Mohammad Fairul Yee Abdullah.

Suara Sarawak