SIBU: Urung 72.1 peratus tauka 390,000 nembiak sekula di menua tu ti udah tembu peresa Setipikit Pelajar Malaysia (SPM) 2021 nadai nampung pelajar ngagai tikas ke tinggi agi.

Lalu asil pansik mega udah mandangka tebal agi sida iya semina ngapuska pelajar naka tikas SPM aja lalu terus milih gawa ari ke nampung pelajar ti mega ulih ngurangka pengereja pengawa ti landik dudi hari ila.

Pansik tu udah dikenataika ‘World Economic Forum’ enggau Kaunsil Produktiviti Malaysia ngagai Gerempung Pekara Pelajar, Saintifik enggau Main Asal Serakup Bansa (Unesco) sebedau dikeluarka ba baruh Ripot ‘Daya Saing’ Global 2019.

“Pekara tu balat ngirauka ati laban ulih meri empas ke chukup besai ngagai produktiviti menua enggau penyampau tubuh pengereja pengawa profesional ti landik jemah ila,” ku Sekretariat Eksibisyen Pelajar Serakup Pemikir Dayak Sarawak (DTTAS), Jacqueline Martin nengah sebengkah penerang.

Iya mega madahka, tu endang bepelasarka asil ari pansik ti udah dipejalaika ngagai rayat menua tu ti beumur 15 nyentukka 64 taun.

Ba pekara ke sama, iya mega ngenang penangul ti udah dipansik Opis Banchi Malaysia (JPM) ba taun 2019 ti madahka 5.8 peratus ari 32 juta iku rayat Malaysia agi tinggal ba sistem pelajar tauka nadai besekula.

JACQUELINE MARTIN

Ku iya, ketebal agi sida ke enda besekula tu iya nya ti datai ari ruang bilik ke seranta lalu sekeda ari sida iya nya nembiak Orang Asli sereta mega peranak asal menua Sabah enggau Sarawak.

“Nya alai sebengkah Eksibisyen Pelajar DTTAS 2022 deka diatur kena 16 nyentukka 17 September tu ti bepalan ba Dewan Komuniti Sibu Jaya dikena nangkup sereta mutarka penanggul tu.

“Eksibisyen tu ila deka berengkah diatur ari pukul 9 pagi nyentukka pukul 5 lemai lalu kami ngarapka sida ti baru tembu nerima pemutus peresa SPM enggau Setipikit Pelajar Tinggi Malaysia (STPM) datai ngulu program tu,” ku padah Jacqueline.

Tandu Jacquline, pengawa tu chukup beguna amat dikena nyeliahka sereta mutarka penanggul nembiak ti enda nampung pelajar sekula sida iya ngagai tikas ke tinggi.

“Aku ngarapka bala nembiak anang bepanggai ba penyulut dalam pelajar sekula aja tang mega patut nampung pelajar sekula sida iya ngagai tikas ke tinggi.

“Pia mega, sida iya mesti nyikap diri enggau ngembuan mayuh penau tambah sereta pengelebih ba mayuh bidang ambika ulih besemekih enggau orang bukai ba makit kereja,” ku tandu Jacquline.

Suara Sarawak