NYAUT TANYA…Henry Jinep lebuh ditanya pemberita rambau Pengerami betemu enggau begulai Presiden PDP di Balai Raya Suarah Bau ditu, kemari.

BAU: Presiden Parti Demokratik Progresif (PDP) Datuk Seri Tiong King Sing deka ngetanka penuduk Parlimen Bintulu rambau Pengawa Bepilih Besai Ke-15 (PRU-15) ti dipelabaka deka diatur enda lama agi.

Mandal Presiden PDP Datuk Henry Harry Jinep madahka pekara nya laban Kaban Parlimen Bintulu nya agi ngembuan sukung ti besai ba konstitusyen nya.

“Ya, iya (Tiong) tetap deka ngetanka penuduk di Bintulu.

“Iya endang chakah ba renggat baruh baka pengawa ngabas rayat taja pan iya kiruh enggau pengawa di Dudong (Dun), iya tetap nyaga Bintulu,” ku iya lebuh ditanya pemberita rambau Pengerami betemu enggau begulai Presiden PDP di Balai Raya Suarah Bau, ditu kemari.

Ngelansa dalam agi, Henry ti mega Sapit Menteri Perengka Pengangkut madahka taja pan Tiong siku Adun Dudong tang iya agi dikerinduka rayat ba Bintulu.

Ku iya, bekau ari nya Duta Khas Menteri Besai Ke China tu seruran ngabas enggau betemu rayat.

“Iya endang suah ngusung rumah panjai. Aku ninga cherita iya ngusung palan ti diabas tumu pukul 5 pagi, orang agi tinduk tang iya udah datai laban deka ngirup pagi enggau orang ba rumah panjai,” ku iya.

Nya alai, Henry madahka raban supreme PDP deka nentuka Tiong bediri ngetanka penuduk Parlimen Bintulu rambau PRU-15 ila.

Suara Sarawak