AUM PEMBERITA…Willie (tiga kiba) nyaut tanya raban pemberita pengudah ngulu Progam ‘Kembaraduga’ enggau Beripai Rejimen Semboyan Infantri di Kampung Annah Rais, ditu, kemari.

PADAWAN: Untung nasip siku-siku chalun ti deka bediri minta pilih ba sitak Parlimen Puncak Borneo ditentuka pengundi.

Kaban Parlimen Puncak Borneo Datuk Willie Mongin madah, iya nadai penanggul nyema mayuh orang ari bemacham parti politik nguji nasip bediri ba Puncak Borneo.

Ku iya, nya endang prinsip demokrasi lalu pia mega Parlimen Puncak Borneo enda sunyi maya semak pengawa bepilih besai nyangka sampai 20 iku chalun minta pilih.

“Sapa aja ulih bediri minta pilih, ngelakuka diri lalu mantaika sapa sida.

“Nya mih demokrasi, nadai sapa ulih nagang sida,” ku iya bejaku ba aum pemberita pengudah ngulu Progam ‘Kembaraduga’ enggau Beripai Rejimen Semboyan Infantri di Kampung Annah Rais, ditu, kemari.

Taja pia iya madah ujung iya ila pengundi deka ngaga pemutus milih sapa ti nyadi pengari Parlimen Puncak Borneo ungkup penggal ti deka datai.

Sapit Menteri Pengawa Bekebun enggau Komoditi nya madah, enda nyamai madah orang ari parti bukai ngelaku diri laban nya endnag udah atur demokrasi.

“Pekara nya sama baka Liga Perdana Inggeris, semua kelab bemain ba tikas ke sama. Sapa nyadi champion, tejuka sida nyadi champion,” ku iya.

Lebuh ditanya pasa sapa chalun ti deka bediri ba Parlimen Puncak Borneo ungkup PRU 15, Willie madah ngelempaika pemutus nya ba tuai Parti Pesaka Bumiputera Bersatu (PBB).

Ku iya, iya deka gawa enggau manah nyema raban tuai PBB ngaga pemutus milih iya nyadi chalun bediri.

“Aku enggau baruh ati ngelempaika pemutus ngagai tuai parti,” ku iya.

Ditanya nyema nadai dipilih nyadi chalun, iya madah pekara nya deka diputus lebuh udah datai maya ke engkeman.

“Amat enda engkeman endur nyaut diatu laban kitai bedau datai ba adan. Nya aku ngasaika nadai kebuah berundingka pekara nya diatu. Arapka semua nya mujur lalu enti maya udah datai, kitai deka ngaga pemutus,” ku iya.

Suara Sarawak